Տնտեսության ակտիվության ցուցանիշը հոկտեմբերին, սեպտեմբերի համեմատ, գրեթե կիսով չափ նվազել էր՝ 14%-ից դառնալով 7.2%: Սակայն, ինչպես այսօր մի քանի լրատվամիջոցների պարզաբանեց էկոնոմիկայի նախարար Տիգրան Դավթյանը, սա անկում չէ, և ամիսն ամսվա նկատմամբ նման տատանումը փոքր տնտեսությունների համար սովորական երևույթ է:
«Դա ամբողջ տարվա ընթացքում, ցանկացած տարի տեղի է ունենում: Կան նաև սեզոնայնության հետ կապված խնդիրներ, արտահանման պայմանագրերի ժամկետների խնդիրներ»,- ասաց Տ. Դավթյանը՝ խորհուրդ տալով նայել վիճակագրության աճողական ցուցանիշները. «Մենք մի քիչ շատ ենք սովորել այս բարձր աճի տեմպերին, բայց այս ռեցեսիոն իրավիճակում շատ քիչ երկրներ կգտնեք աշխարհում, որ ունեն 7.2% տնտեսական ակտիվության ցուցանիշ և 10% արդյունաբերության աճի տեմպեր: Այնպես որ՝ աճի տեմպերն առնվազն ավելի բարձր են, քան մենք նախատեսել էինք պետական բյուջեով»:
