Բոլոր այն հարցերը, որոնք պայմանավորված են Ռոբերտ Քոչարյանի ազդեցությունը քառյակի հետ կապելու հետ, քաղաքական շահարկումներ են՝ այսօր «Ժառանգություն» կուսակցության 10-րդ համագումարի ընթացքում «Առաջին լրատվական»-ի հետ զրույցում նշեց «Ժառանգություն» կուսակցության փոխնախագահ, «Ժառանգություն» խմբակցության ղեկավար Ռուբեն Հակոբյանը:
«Ռոբերտ Քոչարյանը՝ որպես ՀՀ քաղաքացի, որպես երկրորդ նախագահ, իր կարծիքն է արտահայտել, որոնք համընկնում են քառյակի 12 կետերի հետ, և վերջ: Ես այստեղ վերջակետ կդնեի: Իսկ դրա տակ համագործակցություն տեսնելը շահարկում է, որին պետք չի մասնակցել: Լավ է, որ բոլորն իրենց կարծիքն արտահայտում են»,- ասաց նա:
Հարցին՝ կցանկանայի՞ք, որ Ռոբերտ Քոչարյանը վերադառնար քաղաքականություն, Ռուբեն Հակոբյանը ըստ էության չպատասխանեց՝ նշելով հետևյալը. «Յուրաքանչյուր քաղաքացի ինքն է որոշում մասնակցել քաղաքական գործընթացներին, թե ոչ: Ես կցանկանայի, որ ով տեսակետներ ունի՝ արտահայտի դրանք»: Այսինքն՝ դուք բացառո՞ւմ եք որևէ համագործակցություն Ռոբերտ Քոչարյանի հետ հարցին էլ պատասխանեց. «Ես մի բան հստակ կարող եմ ասել, որ այդ 12 կետերը երկարատև աշխատանքի արդյունք են, և որևէ մեկը կապ չի ունեցել դրա հետ: Սա 4 քաղաքական ուժերի միասնական կոնսենսուսային տարբերակն է»:
Ինչ վերաբերում է 12 կետերում Սերժ Սարգսյանի հրաժարականի պահանջի բացակայությանը՝ «Ժառանգության» փոխնախագահն ասաց. «Բոլորը ծանոթ են այս 4 քաղաքական ուժերի դիրքորոշումներին, թե ով ինչ առաջնահերթություններ ունի քաղաքական օրակարգում: Իսկ եթե 4 ուժեր համագործակցում են, դա ենթադրում է, որ ինչ-որ տեղ պիտի զիջումների գնան: Այս պահին 4 ուժերով կարողացանք կոնսենսուսային հարթության վրա արձանագրել այն, ինչ առկա է այդ 12 կետերում»:
