Թուրքիայի արտգործնախարար Ահմեթ Դավութօղթուն հայտարարել է, որ Անկարայի և Երևանի հարաբերություններում կարող է սկսվել նոր փուլ, եթե Հայաստանը և հայկական սփյուռքը գնան համարձակ քայլերի, ինչպիսին էր, օրինակ, Էրդողանի ցավակցությունը: Թուրքիայի արդտգործնախարարի հոդվածը տպագրվել է Turkish Policy Quarterly պարբերականի գարնանային համարում:
Հիշեցնենք, այս տարի՝ Ցեղասպանության նախօրեին, Թուրքիայի վարչապետ Ռեջեփ Թայիփ Էրդողանը հանդես եկավ հայտարարությամբ՝ ցավակցություն հայտնելով «1915թ. իրադարձությունների զոհերի հայ ժառանգներին» և նշելով, որ այդ տարիների «դեպքերը» ընդհանուր ցավ էին Օսմանյան կայսրության ժողովուրդների համար:
Ինչպես հաղորդում է haqqin.az-ը, Դավութօղլուն հայտարարել է, որ Էրդողանի ցավակցությունը չպետք է դիտել որպես կոնյուկտուրային քայլ, այն կարծես թե «նախաբան լինի՝ մտքի և հիշողության փոխակերպման համար»:
«Հայաստանի և Թուրքիայի հարաբերություններում նոր դարաշրջան կսկսվի, եթե քաղաքական գործիչները և մտավորականությունը անեն իրենց հասանելիք գործը՝ երկու կողմերից էլ հոգեբանական խոչընդոտները հաղթահարելու և արդար հիշողություն» ստեղծելու ուղղությամբ»,- ասել է Դավութօղլուն:
Թուրքիայի արտգործնախարարը կարծում է, որ 1915թ. Ցեղասպանության վերաբերյալ ձևավորվել է «անարդար հիշողություն», և որպեսզի հայերն ու թուրքերը հիշեն՝ ինչի միջով են անցել, նրանք պետք է հարգեն միմյանց հիշողությունը:
«Հայերի համար 1915թ. եղել է վերաբնակեցնումների տարի, ինչի ընթացքում եղել են բազմաթիվ մեծ ողբերգություններ: 1915թ. նախորդած և հաջորդած տարիներն էլ հսկայական ողբերությունների տարիներ են եղել Անատոլիայի թուրքերի համար: Հենց այդ ժամանակ թուրքերը գոյատևման պայքար էին մղում Բալկաններում, Չանըքալեում և անկախության համար պատերազմում: Ըստ էության, դա ընդհանուր ցավի ժամանակաշրջան էր»,- գրում է Դավութօղլուն: