«Քոչարյանը երբեք էլ չի հեռացել քաղաքականությունից, որքան մոտենան համապետական ընտրությունները (նկատի ունեմ ինչպես խորհրդարանական, այնպես էլ նախագահական), բնականաբար պետք է ակտիվանա»,-«Առաջին լրատվական»-ի հետ զրույցում նման տեսակետ հայտնեց «Չորրորդ ինքնիշխանություն» թերթի քաղաքական մեկնաբան Արմեն Բաղդասարյանը:
Հարցին, թե հնարավո՞ր է՝ վերադառնա արտահերթ զարգացումների միջոցով, Ա․ Բաղդասարյանը պատասխանեց․ «Արտահերթ ընտրությունները բավականին մեծ հնարավորություն ունեն, բայց արտահերթ զարգացումներ հնարավոր են միայն համաժողովրդավարական շարժման միջոցով՝ հասարակության շատ լայն խավերի մասնակցությամբ: Իսկ ես չեմ կարծում, թե Ռոբերտ Քոչարյանը ունի այդ աջակցությունը, եթե անգամ լինեն արտահեթ ընտրություններ՝ դա Քոչարյանի ղեկավարությամբ չի լինելու, ժողովուրդը Քոչարյանի հետևից չի գնալու»,- ասաց նա:
Հետաքրքրվեցինք նաև, թե հնարավո՞ր է համագործակցություն նաև ոչ իշխանական ուժերի հետ, պարոն Բաղդասարյանին հիշեցրեցինք, որ քառյակից ԲՀԿ-ն արդեն նման հնարավորությունը չի բացառել․ «ԲՀԿ ներկայացուցիչն այդպիսի բան հայտարարեց, Կոնգրեսի ներկայացուցիչն էլ բավականին կոշտ ձևով արտահայտվեց: Ես չեմ կարծում, թե Ռոբերտ Քոչարյանի վերաբերյալ, նրա իշխանության վերաբերյալ հիշողությունները լավն են: Համագործակցություն գուցե լինի, գուցե չլինի, գուցե ինչ-որ հարցերի շուրջ լինի, բայց եթե մենք խոսում ենք իշխանափոխության մասին, ապա այդ հարթությունում ես չեմ կարծում, որ որևէ շարժում, որևէ կուսացկություն, որ հենվում է ժողովրդի վրա՝ չեմ կարծում, թե գնա Քոչարյանի դրոշի հետևից: Իմ պատկերացմամբ՝ այն ուժը, որը կհայտարարի, որ իր առաջնորդը Ռոբերտ Քոչարյանն է՝ իսկույն կզրկվի հասարակական աջակցությունից»:
Այն հարցին, թե հնարավո՞ր է՝ ՀԱԿ-ը մոռանալով մարտի մեկի հանգամանքը, ենթադրենք, պարտադիր կուտակային համակարգի շուրջ համագործակցի Քոչարյանի հետ, մեր զրուցակիցն ասաց․ «Ես կարծում եմ, որ շատ վատ կլինի, որ այդպես լինի, ըստ իս՝ նրանք այդպես չեն անի»:
Հարցազրույցն ամբողջությամբ՝ մեր տեսանյութում