«Քաղաքացիների զանգվածային համատեղ գործունեության հետ կապված բոլոր քայլերը` ուղղված երկրի վիճակի բարելավմանը, ես համարում եմ դրական: Իսկ արմատականությունը պետք է կայանա ոչ թե պարտադիր բախումնային վիճակներ ստեղծելով, այլ ապահովելով Հայաստանի քաղաքացիների ամբողջական հավաքը Աազատության հրապարակում, և այդ ժողովուրդը պետք հայտարարի, որ իշխանությունը վերցնում է իր ձեռքը»,- «Առաջին լրատվականի» հետ զրույցում, անդրադառնալով ՀԱԿ-ի մարտի 17-ի հանրահավաքին, կարծիք հայտնեց «Ղարաբաղ» կոմիտեի անդամ Աշոտ Մանուչարյանը:
Մանուչարյանի կարծիքով, ժողովուրդը իշխանությունը իր ձեռքը վերցնելու հայտարարությունը պետք է անի հենց իր համար և կարողանա դա իրականացնել: Իսկ արմատական քայլերի կողմնակիցների հայտարարություններին անդրադառնալով` Մանուչարյանը նկատեց, որ հատկապես այսօր մենք պարտավոր ենք ապահովել անցնցում, բայց նաև սրընթաց անցում ավելի բարենպաստ վիճակի:
«Արմատականությունը պետք է լինի քաղաքացիական կամքի և մտքի դրսևորման մեջ: Ցանկացած ուրիշ ձև ինչ էլ որ լինի` շտուրմով վերցնեն նախագահական պալատը, վռնդեն, ձերբակալեն իշխանավորներին, նշանակեն մեկ ուրիշին: Այդ քայլերը երաշխիք չեն տալիս, որ քիչ հետո ստիպված չեն լինելու դիմել նույն քայլերին, որովհետև վիճակը դրանով չի փոխվելու: Արմատական փոփոխությունը կայանում է հասարակական գիտակցության և հասարակական կամքի դրսևորման մեխանիզմի հստակեցման մեջ»,- ընդգծեց Մանուչարյանը:
Քաղաքացիական մտքի և կամքի հստակեցման տեսակետից մարտի 17-ի հանրահավաքը, ըստ Մանուչարյանի, ևս մի քայլ էր այդ ուղղությամբ, իսկ ռադիկալիզմի պակաս կար հենց այն իմաստով, որ քաղաքացիների բացարձակ մոբիլիզացիայի հարցը պետք է լուծվի շատ ավելի արագ քայլերով:
