Երեկ հարցազրույցով կարմիր գծերին անդրադարձած Ռոբերտ Քոչարյանին, որը քննադատել էր, այսպես կոչված, փողոցային կայանատեղիների այն պրակտիկան, որ կիրառում է քաղաքապետարանը, պատասխանել է քաղաքապետ Տարոն Մարգարյանը:
Ռոբերտ Քոչարյանը քննադատել էր կայանատեղիների կազմակերպումը մենաշնորհով մասնավոր ընկերությանը շնորհելու և տեղական տուրք սահմանված վճարի 70 տոկոսն այդ ընկերությանը փոխանցելու տարբերակը, որ ընտրել է քաղաքապետարանը:
Եվ ահա, Տարոն Մարգարյանը պատասխանել է Ռոբերտ Քոչարյանին: Պետք է ասել, որ Տարոն Մարգարյանի պատասխանը, ինչպես և սպասելի էր, մինչև այսօր Ռոբերտ Քոչարյանին ՀՀԿ-ականների տված պատասխաններից ամենաանհասկանալին էր: Նույնիսկ Կարեն Ավագյանը, որին համացանցում «Փուչիկ Կարեն» են կնքել (Հանրապետության հրապարակի փուչիկների պայթյունից), ավելի հասկանալի պատասխաններ էր գրում իր գրասենյակի անունից, քան Տարոն Մարգարյանի պատասխանը: Սակայն այս ամենը խոստանում է շատ հետաքրքիր լինել, և Ռոբերտ Քոչարյանին, ըստ էության, սադրում են մի ուղղությամբ, որտեղ Անդրանիկ Մարգարյանի գործոնն է: Այս գործոնն, ըստ էության, եղել է Ռոբերտ Քոչարյանի նախագահության, այսպես ասած, կայունության և հավասարակշռության կարևոր առանցք:
Անդրանիկ Մարգարյանի քաղաքական գործոնը պահում էր քոչարյանական նախագահության ողջ շրջանը, և ըստ էության հենց Մարգարյանն առանցքային դերակատարում ունեցավ Հոկտեմբերի 27-ից հետո Քոչարյանի դիտորդի դերից դուրս գալու հարցում: Եվ ահա, այսօր, ըստ էության, ստեղծվում է մի իրավիճակ, երբ Անդրանիկ Մարգարյանի որդու և Ռոբերտ Քոչարյանի միջև կարող է ձևավորվել, այսպես ասած, մինի-կոնֆլիկտ, ինչպիսին մենք տեսնում էինք, օրինակ, Ռոբերտ Քոչարյանի և Տիգրան Սարգսյանի միջև: Սակայն այս դեպքում, չայած Տարոն Մարգարյանի կալիբրի նվազ լինելուն, այնուհանդերձ հենց Անդրանիկ Մարգարյանի գործոնն է, որ շատ հատկանշական է դարձնելու այս հնարավոր բանավեճը ողջ իշխանական համակարգի համար:
Այս տեսանկյունից հետաքրքրական է լինելու տեսնել, թե արդյո՞ք Ռոբերտ Քոչարյանը կմտնի այդ բանավեճի մեջ և կպատասխանի Տարոն Մարգարյանին, թե՞ չի տրվի նրբորեն հյուսված սադրանքին և կգերադասի կուլ տալ Տարոն Մարգարյանի հակաճառումը, քան ներքաշվել մի բանավեճի մեջ, որն, ըստ էության, էներգետիկ իմաստով հարված է լինելու Ռոբերտ Քոչարյանի նախագահության ողջ շրջանին, ասել է թե` քոչարյանական կրեդոյին:
