Ամերիկյան Նյուարք քաղաքի քաղաքապետ Կորի Բուքերը կփորձի առնվազն մեկ շաբաթ գոյատևել՝ սնունդ ստանալով պետական կտրոններով՝ ապացուցելու համար դպրոցական սննդի պետական ֆինանսավորման անհրաժեշտությունը: Ինչպես տեղեկացնում է ITAR-TASS-ը՝ նման արտասովոր քայլի պատճառը Twitter-ի օգտատերերից մեկի հետ կնքած գրազն է:
Բուքերը մի կնոջ հետ քննարկել է հարցն այն մասին, թե կառավարությունը պե՞տք է արդյոք ֆինանսավորի դպրոցական սննդի ծրագիրը: Կինը, որը հանդես է եկել ԹվիթՎիթ կեղծանվան ներքո, կարծիք է հայտնել, որ դա կառավարության պարտականությունը չէ, և որ չկան այնպիսի ընտանիքներ, որոնք չկարողանան իրենց երեխաների համար նախաճաշ ապահովել: Ի պատասխան քաղաքապետը գրել է. «Եկեք փորձենք գոյատևել և ընտանիք կերակրել պետական կտրոններով մեկ շաբաթվա կամ ամսվա ընթացքում Նյու Ջերսիում, որտեղ կյանքը շատ թանկ է: Կստացվի՞»:
«Պայմանավորվեցինք, պարոն քաղաքապետ»,- պատասխանել է Բուքերի զրուցակիցը:
Դրանից հետո քաղաքապետը առաջարկել է «դատավոր» գտնել և նկարահանել իրենց «փորձը»:
Քաղաքապետի ներկայացուցչի խոսքով՝ գրազն ուժի մեջ կմտնի հավանաբար դեկտեմբերին՝ բոլոր մանրամասների համաձայնեցումից հետո: Ի դեպ, կինն իր մասին խոսելիս ներկայացել է որպես զինուժի վետերան և զինծառայողի կին:
Նշենք, որ դեմոկրատ Բուքերը ԱՄՆ-ի ամենահայտնի քաղաքապետերից է: Ապրիլին նա ոստիկանների հետ միասին այրվող տնից մի կնոջ էր փրկել:
