Թուրքական TRT Haber հեռուստաալիքի փոխանցմամբ՝ այսօր Թուրքիայում մեկնարկում է 1980 թվականի սեպտեմբերի 12-ին իրականացված ռազմական հեղաշրջման կազմակերպիչներ, հեղաշրջման ժամանակ Թուրքիայի զինված ուժերի գլխավոր շտաբի պետը Քենան Էվրենի և ռազմաօդային ուժերի հրամանատար Թահսին Շահինքայայի գործով դատավարության 7-րդ նիստը (մնացյալ կազմակերպիչներն այսօր ողջ չեն):
Նրանք առաջին անգամ են մասնակցում իրենց գործով դատական նիստին և առաջին անգամ կնստեն ամբաստանյալի աթոռին: Մինչ այս 1917 թվականին ծնված Էվրենն ու 1925 թվականին ծնված Շահինքայան իրենց առողջական խնդիրների պատճառով չեն մասնակցել դատական նիստերին:
Հիշեցնենք, որ 1980 թվականի սեպտեմբերի 12-ին Թուրքիայի զինված ուժերի գլխավոր շտաբի պետ, բանակի գեներալ Քենան Էվրենի իրականացրած ռազմական հեղաշրջման արդյունքում արձակվեց երկրի խորհրդարանը, տապալվեց Սուլեյման Դեմիրելի գլխավորած կառավարությունը։ Դեմիրելը, ինչպես նաև ընդդիմության առաջնորդներ Բյուլենթ Էջևիթն ու Ալփասլան Թյուրքեշը ձերբակալվեցին։ 1982 թվականի նոյեմբերի 7-ին Քենան Էվրենը դարձավ Թուրքիայի 7-րդ նախագահ:
Երկրում փակվեցին բոլոր քաղաքական կուսակցությունները, և մտցվեց ռազմական դրություն։ Հեղաշրջման նախապատրաստման համապատասխան հիմքի ստեղծման համար ձախ և աջ արմատականների միջև մինչև հեղաշրջման առավոտ հրահրված բախումներում զոհվեց 2000 մարդ, հեղաշրջման արդյունքում բանտարկվեց 650,000 մարդ, ոստիկանությունում հարուցվեց 1,683,000 գործ, քաղաքական պատճառներով հարուցված 210,000 գործի շրջանակներում դատարանում հայտնվեց 230,000 մարդ, 517 մարդ ստացավ առավելագույն պատժաչափ, միևնույն ժամանակ՝ այդպիսի պատժաչափ էր սպառնում 7000 հոգու, 388,000 մարդ զրկվեց անձնագրից, աշխատավայրից վտարվեց մոտ 30,000 մարդ (նրանց ասացին, որ իրենք վտանգավոր են), որոնցից 20,000-ը ներկայացնում էին կրթական համակարգը, 14,000 մարդ զրկվեց քաղաքացիությունից, մոտ 30,000 մարդ փախավ երկրից, գրաքննության նկատառումներից ելնելով` արգելվեց 937 ֆիլմ, 400 լրագրողների համար առաջարկվեց 4000 տարվա բանտարկության մեղադրանք, 300 օրվա ընթացքում թերթերը չհրապարակեցին հետաքննության մասին նյութեր, ոչնչացվեց 37,000 տոննա թերթ ու հանդես։
