Մինչ «Բարգավաճ Հայաստան» կուսակցության ներկայացուցիչներ Վարդան Օսկանյանն ու Նաիրա Զոհրաբյանը քաղաքական կուսակցությունների գրասենյակներում հանդիպումներ են ունենում՝ քաղաքական ուժերին բացատրելով 100 տոկոս համամասնական ընտրակարգի ու խորհրդարանական կառավարման համակարգին անցնելու հրամայականը, նույն կուսակցության փոխնախագահ, Գյումրիի քաղաքապետ Սամվել Բալասանյանը որոշում է կայացնում իր ղեկավարած ԲՀԿ կառույցի հետ միասին սատարել մեծամասնական ընտրակարգով Գյումրիի թիվ 35 ընտրատարածքում առաջադրված Արման Սահակյանին, ով պարտվել էր խորհրդարանական ընտրություններում:
ԲՀԿ ներկայացուցիչ Վարդան Օսկանյանը «Ազատ դեմոկրատների» հետ հանդիպումից հետո երեկ հրաժարվեց պատասխանել այդ կապակցությամբ «Առաջին լրատվական»-ի հարցերին:
ԲՀԿ մամլո խոսնակ Տիգրան Ուրիխանյանը մեր հարցին, թե ԲՀԿ-ն մի կողմից կոնսուլտացիաներ է անում ընդդիմադիր ուժերի հետ, մյուս կողմից` սատարում է ՀՀԿ թեկնածուին, պատասխանեց. «ԲՀԿ-ն ոչ մի կողմից Հանրապետականին չի սատարում: Տարածքային կառույցը կայացրել է որոշում տեղում տարածքի պատգամավորի ընտրության հետ կապված, բացառապես հաշվի առնելով, որ ԲՀԿ-ն այդտեղ չունի թեկնածու»: Հիշեցնենք, սակայն, որ ժամանակ առաջ տեղեկություն տարածվեց, որ հոր փոխարեն այդ տարածքում առաջադրվելու է Սամվել Բալասանյանի որդին՝ Գյումրիի գարեջրի գործարանի տնօրեն Միսակ Բալասանյանը, սակայն նրա թեկնածությունը չհաստատվեց: «Վիճակն էսպիսին է. Գյումրիի տարածքային կառույցը ձեռք է բերել որոշում կայացնելու իրավասություն և կայացրել է սատարելու որոշում»,- ասաց Ուրիխանյանը: Հետաքրքրվեցինք, թե Գագիկ Ծառուկյանը տեղյա՞կ է, որ նման որոշում կա: «Դա տարածքային կառույցի որոշում է, բնականաբար չէր կարող աննկատ մնալ»,- ասաց խոսնակը:
Հիշեցենք, որ խորհրդարանական ընտրությունների ժամանակ Սերժ Սարգսյանն անձամբ կոչ արեց սատարել Սամվել Բալասանյանին, իսկ ՀՀԿ-ն որոշում կայացրեց նրան սատարելու մասին: Մեր հարցին, թե ԲՀԿ կառույցը, որ այդքան շնորհակալ է ՀՀԿ-ին ու Սերժ Սարգսյանին, հնարավո՞ր է նախագահական ընտրություններում սատարի Սերժ Սարգսյանին, և հնարավո՞ր է այս օրինակով ԲՀԿ առանձին կառույցներ որոշում կայացնեն Սերժ Սարգսյանին սատարելու վերաբերյալ, Ուրիխանյանը հայտարարեց. «Իհարկե` ոչ: Իհարկե ազատ չեն: Խոսքը տեղական ընտրությունների մասին է գնում, տեղական իրենց տարածքին վերաբերող: Համապետական ընտրությունների վերաբերյալ ոնց կարող են տարածքայիններն առանձին որոշում ունենալ»:
Գյումրիի քաղաքապետարանի մամլո խոսնակ Զոհրաբ Եգանյանը մեզ հետ զրույցում ասաց, որ ՀՀԿ թեկնածու Արման Սահակյանին սատարելու հարցը քննարկվել է Գյումրիի թիվ 35 ընտրատարածքի կուսակցական ժողովում, որը գլխավորել է Սամվել Բալասանյանը, և «համայնքի անդամների ու անհատների հետ քննարկումների արդյունքում որոշում է կայացվել, որ դեկտեմբերի 2-ին կայանալիք խորհրդարանական ընտրություններում Սամվել Բալասանյանը պաշտպանելու է Արման Սահակյանի թեկնածությունը»: Մեր դիտարկմանը, թե ստացվում է՝ սա քաղաքական առևտուր է՝ Բալասանյանին սատարեցին, հիմա էլ Բալասանյանն է սատարում ՀՀԿ-ականին, Զոհրաբ Եգանյանն ասաց. «Չէ՛, էստեղ հարցը պետք չի նայել կուսակցական տեսանկյունից: Մեծամասնական ընտրությունները դրանք անհատների ընտրություններ են: Այսինքն՝ մարդը ձայն է տալիս ոչ թե կոնկրետ քաղաքական ուժի, այլ անհատի: Արդեն իսկ պարոն Բալասանյանը փաթեթ է փոխանցել պարոն Սահակյանին, թե իր ծրագրերից որոնք են ավարտված, որոնք են ընթացքի մեջ: Եթե Արման Սահակյանը դառնա պատգամավոր, մենք հույս ունենք և վստահություն ունենք, որ դրանք ևս կշարունակվեն»:
Արման Սահակյանի ընտրության հարցում ՀՀԿ-ին, թերևս, հետաքրքիր են Գյումրիի քաղաքապետարանի լծակները: Մեր հարցին, թե նշանակո՞ւմ է, որ քաղաքապետարանի լծակներն ուղղվելու են Արման Սահակյանի ընտրությանը, քաղաքապետարանի խոսնակը հակադարձեց. «Ո՛չ, քաղաքապետարանը ապաքաղաքական կառույց է»:
