«Բարգավաճ Հայաստան» կուսակցությունը նախաձեռնած քաղաքական կոնսուլտացիաների շրջանակներում երեկ խորհրդարանական ուժերից վերջինի հետ հանդիպումն ավարտեց. «Ազատ դեմոկրատներ» կուսակցության գրասենյակում հերթական մի քանի ժամանոց հանդիպումից հետո գրեթե կրկնվեց մյուս հանդիպումների, մասնավորապես ՀԱԿ-ի, ՀՅԴ-ի հետ բանակցությունների արդյունքների վերաբերյալ հայտարարությունը, թե կուսակցությունների քննարկվող օրակարգերում մի շարք կետեր համընկել են, ինչը հիմք է տալիս շարունակել հետագա բանակցությունները: ԲՀԿ-ի նախաձեռնությանը զուգահեռ, ինչպես «Հրապարակ»-ը հայտնել էր, շաբաթ օրվանից կոնսուլտացիաների շարք է սկսել ՀՅԴ-ն իր 7 կետանոց քաղաքական օրակարգով` շաբաթ օրը հանդիպելով ՕԵԿ, երեկ` ՀԱԿ ներկայացուցիչների հետ: Առաջիկայում հանդիպումներ են սպասվում մյուսների հետ: Թե ինչու են մեր քաղաքական ուժերն առանձին-առանձին նման նախաձեռնություններով հանդես գալիս, և ինչ են տալիս այս «կոնսուլտացիաները», «Հրապարակ»-ը լսեց «Նոր ժամանակներ» կուսակցության ղեկավար Արամ Կարապետյանին: Նշենք, որ ԲՀԿ-ն հայտարարել է, թե նման հանդիպումներ են նախատեսվում նաև արտախորհրդարանական ուժերի հետ:
– Պարոն Կարապետյան, ԲՀԿ-ն Ձեզ առաջարկե՞լ է հանդիպում, կամ Դուք պատրաստվո՞ւմ եք նման հանդիպման:
– Ոչ, ճիշտն ասած` կոնսուլտացիաների օրակարգը (պառլամենտական համակարգին և 100 տոկոսանոց համամասնական ընտրակարգին անցում կատարելու երկու կետերն են ընդգրկված օրակարգում` Լ. Շ.) հիմա նախ ժամանակավրեպ է, դա պետք էր անել խորհրդարանական ընտրությունների ժամանակ, երկրորդ` իմ կարծիքով, նման օրակարգով կոնսուլտացիաները ներկա իրավիճակը փոխելու հիմք չեն տա, ապագայում շատ լավ կլինի, որ քաղաքական ուժերը նման օրակարգով կոնսուլտացիաներ վարեն:
– Իրենց ընդդիմադիր հռչակած խորհրդարանական ուժերն ընդունել են նման օրակարգով քննարկումներ անցկացնելու առաջարկները, ինչո՞ւ:
– Դա իրենց գործն է, ես խնդիր չեմ տեսնում դրա մեջ, շատ լավ է, շատ ուրախ ենք, աստված տա` ինչ-որ օրակարգային խնդիր լուծեն: Բայց զուտ դրանց մասնակցել` մասնակցության համար, եթե ի սկզբանե տեսակետները տրամագծորեն հակառակ են: Մենք միշտ եղել ենք և ենք նախագահական ուժեղ պետության կողմնակից:
– Ձեր կարծիքով, քաղաքական նման օրակարգի կամ առհասարակ կոնսուլտացիաներ սկսելու գործընթացի տողատակում ի՞նչ է թաքնված, գուցե սա ընդդիմությունը համախմբելու փո՞րձ է:
– Շատ լավ է, որ քաղաքական օրակարգով է այդ ամենը լինում, այո, ես կարծում եմ, որ ընդհանուր ընդդիմադիր դաշտ ձևավորելն է, և որպեսզի հետագայում այդ դաշտը կարողանա ծնի միասնական թեկնածու կամ որոշակի ուժերի, ավելի շատ ուժերի` մի թեկնածուի պաշտպանելու խնդիր, սա ոչ թե տողատակերում, այլ` ուղղակի: Դա հասկանալի է և ինձ համար քաղաքական տեսակետից` շատ ընկալելի: Բայց, այսօրվա իրողությունների պարագայում, նույնիսկ եթե միասնական թեկնածու ձևավորվի, կարծում եմ` իրավիճակի փոփոխությունն այստեղ չի:
– Ուզում եք ասել պայմանավորվածությունների շրջանակո՞ւմ է այդ միասնական թեկնածուն ձևավորվելու, թե՞ ընտրական պրոցեսների վրա հույս դնել պետք չէ:
– Ես դեռ դա չգիտեմ, որովհետև ինչ-որ բան քանի չի կայացել, միանգամից աղտոտել էլ պետք չի: Բայց իմ տեսակետը կարող եմ ասել, քանի որ խորհրդարանական ընտրությունները բոլորիս ցույց տվեցին, թե մենք ինչպես ենք կայանում, ես չեմ տեսնում որևէ բան փոխված լինի և չեմ տեսնում, որ իշխանությունը լեգիտիմացնելու ամենալավագույն միջոցը հենց այդ միասնական թեկնածուին հանգիստ հաղթելը չի: Այսինքն` ես չեմ տեսնում, որ ընտրություններով ռեալ հնարավոր է որևէ բան փոխել:
– ՀԱԿ-ն իր քաղաքական օրակարգում համատեղ զանգվածային միջոցառումներ անցկացնելու կետ է ընդգրկել, գուցե քաղաքական ուժերը վերջնատարբերակում հենց այդ կետի շո՞ւրջ համաձայնության գան:
– Ոչ, որովհետև քաղաքական օրակարգն ի սկզբանե նպատակաուղղված է ընտրությունների մասնակցությանը և հաղթելուն, ապա եթե այսպես շարունակվի, այս ամենը ընդամենը հանգեցնելու է միասնական շտաբի նման ինչ-որ բանի: Խորհրդարանական ընտրություններին էլ կային զանգվածային միջոցառումներ, բայց հետո զանգվածային որևէ միջոցառում դուք տեսա՞ք: Այսինքն` դա պլանավորված չէր քաղաքական ուժերի մեջ, ես տեսնում եմ, որ այդ պլանավորման գործընթացն իշխանության կողմից շարունակական է, ես չեմ ասում դա ճիշտ է, մասնակից են մյուս ուժերը, ճիշտ հասկացեք, ես ասում եմ` իշխանությունը նույն տրամաբանությամբ շարունակում է նույն գործելակերպը, էլի ուզում է պլանավորել, էլի ուզում է գտնել մեկին, որին կհաղթի, բայց որը ժողովրդին փողոց դուրս չի բերի, որ շարժում չլինի:
– Այսինքն` այս պարագայում պետք է բացառել այդքան շրջանառվող խոսակցությունները, թե Քոչարյանը կամ Ծառուկյանը կարող են միասնական թեկնածու ընտրվել…
– Ես ոչ մի բան չեմ բացառում, որովհետև իրավունք էլ չունեմ բացառելու, իրավունք էլ չունեմ կարծիք ասելու, որովհետև, չմասնակցելով այդ կոնսուլտացիաներին, կարող եմ զուտ անալիտիկ բան ասել, ես չգիտեմ, ամեն ինչ էլ հնարավոր է: Մենք այժմ լսել ենք մի օրակարգի մասին, որի մասին հայտարարել են:
– Գուցե ծրագրվում է նաև հետընտրական փուլում ազգային համաձայնության կառավարությո՞ւն ստեղծել, ինչի մասին խոսվում է:
– Այո, իհարկե, չի բացառվում:
– Պարոն Կարապետյան, այս ուժերը իրենց կոնսուլտացիաներով ու համախմբումով արդյո՞ք չեն բացառում երրորդ ուժի, ալյանսի ձևավորումը` հանձին Նժ-ի, «Հանրապետություն» կուսակցության:
– Հակառակը, այս ինտրիգի հանգուցալուծումից հետո լավ դաշտ է բացվելու երրորդ ուժերի համար:
– Իսկ ժամանակը կարճ չէ՞, կհաջողվի՞ համախմբվել և համախմբել հասարակությանը:
– Ես մի բան ասեմ, շատ ճիշտ նկատեցիք` երրորդ ուժեր, որն այսօր կարող է շատ լուրջ ձևավորվել, մնացել է հասարակության վերջին հույսը, որը կկարողանա ինչ-որ ռադիկալ քայլեր անել: Հիմա այդ ուժն էլ եթե մինչև վերջ ոչնչացվի, ապա ապագա 10 տարում Հայաստանում ինչ ուզեն` կանեն:
– Հաշվի առնելով բանակցող ուժերի հայտարարությունները, որ, օրինակ, ԲՀԿ-ն ասում է, որ իր թեկնածուին պետք է սատարեն, որովհետև երկրորդ խորհրդարանական ուժն է մեծությամբ, ՀԱԿ-ականները Տեր-Պետրոսյանի սատարմանն են կողմ և այլն, կձևավորվի՞ միասնական թեկնածու:
– Անշուշտ` ոչ:
