«Առավոտ»-ը զրուցել է հրապարակախոս Ալվարդ Պետրոսյանի հետ:
– Տևական ժամանակ հայտնի պատճառով Ձեր ձայնը լսելի չէր, ԶԼՄ-ների բազմաթիվ հրավերները չէիք ընդունում, հարցազրույցներից հրաժարվում էիէ: Միով բանիվ, վստահ եմ` նաև այս ընթացքում հետևել եք երկրում կատարվող իրադարձություններին, քանզի անտարբեր չէիք կարող լինել ընթացող գործընթացների հանդեպ: Դարձյալ նախագահական ընտրությունների շեմին ենք, և դարձյալ ամենատարբեր սոցհարցումներ են անցկացվում: Ահավասիկ դրանցից մեկի տվյալներով` նախագահի հնարավոր թեկնածուներից հարցվածների առավել ձայները տրվել են ԲՀԿ նախագահ Գագիկ Ծառուկյանին: Ի դեպ, ԲՀԿ ներկայացուցիչ Նաիրա Զոհրաբյանը նախօրեին հայտարարեց, թե ԲՀԿ-ն նախագահական ընտրություններին պետք է մասնակցի սեփական թեկնածուով, և այդ թեկնածուն պետք է լինի բացառապես և միայն Գագիկ Ծառուկյանը:
– Ընտրություններից առաջ նմանատիպ հարցումները խարդավանք եմ համարում` արհեստականորեն սարքված գնահատականներ: Սա ասելով` ես բնավ այն կարծիքին չեմ, թե մեզ մոտ ամեն ինչ իդեալական բարձր մակարդակով է ընթանում: Պիտի ասեմ, որ Գագիկ Ծառուկյանի կերպարը շատ հետաքրքիր է. հայ մարդու, մանավանդ` կանանց համար նա մի տեսակ մանկական, ժպտուն, ուժեղ կերպար է, որը բացասական էներգետիկա չունի: Եվ այս զեղումը շատ հնարավոր է, որ դրական լինի: Բայց մեր ժողովուրդը շատ հետաքրքիր է` զեղումները մի կողմ է թողնում, երբ գալիս է վճռական պահը, և սառը դատողությամբ է իր ընտրությունն անում: Ի դեպ, չեմ ուզում ասել, թե այդ սոցիոլոգիան սարքովի է, թեև ընդհանրապես խիստ կասկածում եմ սոցհարցումներին: Սա նախընտրական հատուկ քաղաքականություն է, որ աշխարհում ամենուր իրականացվում է: Իսկ ժողովուրդը բնազդով զգում է, որ վառվող ու խորտակվող աշխարհում է ապրում, մեր շուրջբոլորը վառվում է և սուզվում, ու մենք այս պահին ոչ թե ուժեղ, հարուստ, բարի, այլ փորձառու մարդկանց հետևից ենք գնալու:
Ասում ենք` նախագահական ընտրություններ, բայց մենք ազգապետ ենք ընտրելու:
