Երեկ ԱԺ ՀԱԿ խմբակցությունում տեղի են ունեցել ՀԱԿ-ի և ՀՅԴ-ի քաղաքական կոնսուլտացիաները: ՀՅԴ-ի կողմից հանդիպմանը մասնակցել են ԳՄ ներկայացուցիչ Արմեն Ռուստամյանը և ԳԱ փոխներկայացուցիչներից Աղվան Վարդանյանը: ՀԱԿ-ից հանդիպմանը մասնակցել են ՀԱԿ համակարգող Լևոն Զուրաբյանն ու ՀՀՇ վարչության նախագահ Արամ Մանուկյանը: «Հայկական ժամանակ»-ը գրում է, որ մոտ երկու ժամ տևած հանդիպումից հետո և´ Լևոն Զուրաբյանը, և´ Արմեն Ռուստամյանը լրագրողներին հայտնել են, որ տեղի է ունեցել բավական խորքային քննարկում, ՀՅԴ-ն ներկայացրել է իր 7 կետանոց պլատֆորմը: Երկու կողմն էլ չեն բացառել նախագահական ընտրություններում միասնական թեկնածուով հանդես գալը, թեև նշել են, որ անձի հարց չեն քննարկել:
Հիշեցնենք, ՀԱԿ-ԲՀԿ հանդիպումից հետո էլ Զուրաբյանը չէր բացառել, որ նախագահական ընտրություններում իրենք և ԲՀԿ-ն կարոդ են հանդես գալ միասնական թեկնածուով, որից հետո Աժ ԲՀԿ խմբակցության քարտուղար Նաիրա Զոհրաբյանը հայտարարեց, թե իրենց մարզային կառույցները համարում են, որ ԲՀԿ-ն պետք է հանդես գա նախագահի սեփական թեկնածուով, և այդ թեկնածուն Ծառուկյանն է: ՀԱԿ-ն էլ շարունակում է Տեր-Պետրոսյանի շուրջ համախմբվելու կոչեր անել: Նշենք, որ անցած շաբաթ օրը տեղի է ունեցել նաև ՀՅԴ-ՕԵԿ հանդիպում: Իսկ երեկ հանդիպել են ԲՀԿ-ն և «Ազատ դեմոկրատները»: Երեկվա այս հանդիպումով ԲՀԿ-ն, ըստ էության, ավարտեց իր նախաձեռնած կոնսուլտացիաների 1-ին փուլը:
«ՀԺ» հետ զրույցում Նաիրա Զոհրաբյանն ասաց, որ կոնսուլտացիաների 1-ին փուլին կարող է հետևել 2-րդ փուլը: Նա չբացառեց նաև, որ վերջում հնարավոր է բոլոր ուժերով նույն սեղանի շուրջ քննարկեն իրենց առաջարկները:
Ի դեպ, քաղաքական կոնսուլտացիաների վերաբերյալ երեկ մամուլի հաղորդագրություն է տարածել ՕԵԿ-ը: Ըստ այդմ, նոյեմբերի 16-ին ՕԵԿ նախագահ Արթուր Բաղդասարյանը քաղխորհրդի նիստ է հրավիրել: Որոշվել է հավանություն տալ քաղաքական ուժերի միջև սկսված կոնսուլտացիաներին: Կառավարման խորհրդարանական համակարգին անցնելու ԲՀԿ-ի առաջարկը, սակայն, համարվել է ժամանակավրեպ և անընդունելի` ներկա բարդ աշխարհաքաղաքական պայմաններում, իսկ 100 տոկոս համամասնական ընտրակարգին անցման վերաբերյալ առաջարկին ՕԵԿ-ն անհրաժեշտ է համարել անդրադառնալ առաջիկա նախագահական ընտրություններից հետո:
