Միացյալ Թագավորության վարչապետ Դևիդ Քեմերոնը խիստ քննադատության է ենթարկել Եվրամիության ֆինանսական կառույցներին՝ վատ պլանավորման և միության բյուջեն քամուն տալու համար: Այսօր այս մասին վարչապետը հայտարարել է բրիտանացի արդյունաբերողների համաժողովի ժամանակ, որը կայացել է Լոնդոնում:
Քեմերոնի ելույթը հիմնականում այն մասին էր, որ ինքը հետագայում ևս կոշտ դիրքորոշում կցուցաբերի 2014-2020 թթ. ԵՄ միասնական բյուջեի վերաբերյալ բանակցություններում: «Ես հաստատ ներողություն չեմ խնդրի այն բանի համար, որ ներկայացնում եմ իմ երկրի շահերը Եվրոպայի հետ բանակցություններում»,- հայտարարել է Քեմերոնը: Միևնույն ժամանակ, ըստ վարչապետի, ինքը շարունակում է մնալ լավ «եվրոպացի»:
«Ես չեմ կարծում, թե վատ եվրոպացի կդառնամ, եթե միության համար ավելի կոշտ ֆինանսական համաձայնագիր եմ ցանկանում։ Մեծ Բրիտանիայում մենք ստիպված եղանք չեղյալ հայտարարել որոշ բոնուսներ, սառեցնել աշխատավարձեր, մեկ երրորդով կրճատել երկրի բյուջեն: Ինչ իմաստ ուներ այս ամենը, եթե ԵՄ բյուջեն պետք է անընդհատ աճի, աճի և աճի»,– նշել է նա:
«Ընդհակառակը՝ ես կարծում եմ, որ միջոցները քամուն չտալը ինձ լավ եվրոպացի է դարձնում։ Կարծում եմ, որ ինձ հետ կհամաձայնեն տարածաշրջանի շատ բնակիչներ, ովքեր ցանկանում են, որ մենք դադարենք նրանց կողոպտել՝ ԵՄ բյուջեն հարստացնելու համար: ….Պետք չէ մոռանալ, որ այժմ էլ շատ միջոցներ աննպատակ են ծախսվում»,- ասել է Քեմերոնը։
Ինչպես այսօր նշել է Financial Timse–ը, որոշ երկրներ այնպիսի կասկածանքով են վերաբերվում Եվրամիության հանդեպ Լոնդոնի քաղաքականությանը, որ պատրաստ են նրան բացառել միասնական բյուջեից: Ըստ պարբերականի՝ դրանով իսկ սկիզբ կդրվի ԵՄ-ից Մեծ Բրիտանիայի դուրս գալուն:
