WikiLeaks-ի հիմնադիր Ջուլիան Ասանժը հայտարարել է, որ վախենում է իր հարազատների անվտանգության համար: Նրա խոսքով՝ մոր և երեխաների հասցեին սկսել են անանուն սպառնալիքներ ստացվել այն բանից հետո, երբ ինքը թաքնվել է Լոնդոնում՝ Էկվադորի դեսպանատանը: Այս մասին գաղտնազերծողը հայտարարել է մամլո ասուլիսի ժամանակ, որն անցկացվել է դեսպանատան շենքում: Հունիսի 19-ին լրացել է երկու տարին այն պահից, երբ նա թաքնվեց դիվանագիտական ներկայացուցչության տարածքում՝ փոխանցում է ITAR-TASS-ը:
Ասանժի խոսքով՝ իր հարազատներից ոմանք ստիպված են եղել փոխել իրենց անուններն ու բնակավայրերը:
Ասանժը 4 երեխա ունի: Նրանցից ավագը 23 տարեկան է, կրտսերը՝ 3:
Ավստրալացին կրկնել է, որ մտադիր չէ լքել դեսպանատան տարածքը, քանի որ այդ դեպքում նա կարող է հանձնվել ԱՄՆ իշխանություններին:
Շվեդիայում էլ նրան մեղադրում են սեռական ոտնձգությունների համար: Նրա խոսքով՝ հաջորդ շաբաթ իր փաստաբանները Շվեդիայում պաշտոնական միջնորդություն կներկայացնեն իր դեմ տարվող քննության դադարեցման կապակցությամբ:
Մամլո ասուլիսին տեսակապով մասնակցել է Էկվադորի արտգործնախարար Ռիկարդո Պատինյոն: Նա վստահեցրել է, որ Ասանժը կարող է դեսպանատանը մնալ անսահմանափակ ժամկետով: