Դեղերի պետական գնումների ոլորտում բացահայտումներից հետո առողջապահության նախարարությունը օրենսդրական փոփոխությունների մեծ փաթեթ է նախապատրաստել և ներկայացրել Տնտեսական մրցակցության պաշտպանության պետական հանձնաժողով՝ եզրակացության համար: Այս մասին «Առաջին լրատվական»-ի հետ զրույցում հայտնեց ՏՄՊՊՀ նախագահ Արտակ Շաբոյանը:
Հիմնական փոփոխությունները վերաբերում են գնումների կարգավորմանը, լիցենզավորմանը, այսինքն` այն բոլոր խնդիրներին, որ վերջին ժամանակներս բարձրացվեցին: Նախապատրաստված օրենսդրական փոփոխությունները ԱՆ-ն ուղարկել է բոլոր գերատեսչություններին` առաջարկությունների համար:
Հետաքրքրվեցինք՝ նախարար Դերենիկ Դումանյանը առաջարկ էր հնչեցրել, որ բուժհաստատությունները դեղերի գնումների իրենց ցուցակները ներկայացնեն ԱՆ, որը կկատարի գնումը և կբաժանի հիմնարկներին` արդյոք այս դեպքում մրցակցության սկզբունքները կպահպանվե՞ն. ներկայում գործում է ապակենտրոնացված համակարգ, իսկ այդ տարբերակը կլինի կենտրոնացված: Ա. Շաբոյանը նշեց, որ այս հարցի վերաբերյալ վերջնական դիրքորոշում չի կարող հայտնել, քանի դեռ չի ուսումնասիրել. «Մեր դիրքորոշումն այն է, որ բոլոր պետական գնումները առավելագույնս պետք է լինեն մրցույթների միջոցով, որպեսզի մրցակցություն ապահովվի, և մրցակցության արդյունքում պետությունը շահի: Սա` տեսականորեն, որ պետք է պաշտպանենք»:
Ամեն դեպքում, ըստ Շաբոյանի, համակարգում 100-ից ավելի բուժհաստատություններ կան, որոնք առանձին մրցույթներ են իրականացնում, իսկ կենտրոնացված համակարգով, կանոնների շրջանակում գնումների օրենսդրության ընթացակարգը պետք է պահպանվի, և մրցույթներ իրականացվեն:
«Բուժհաստատությունները գտնվում են ԱՆ, քաղաքապետարանի, մարզպետարանների ենթակայության տակ, դրա համար միանշանակ ասել հնարավոր չէ»,- ասաց Ա. Շաբոյանը: