Իրանական ISNA լրատվական գործակալության փոխանցմամբ՝ Իրանի հոգևոր առաջնորդ, այաթոլլահ Սեյեդ Ալի Խամենեին հայտարարել է, որ իրական մուսուլմանի համար կարևոր պարտականություն է ուխտագնացության գնալը.
«Ուխտագնացության իրականացմամբ մուսուլմանները զգում են իսլամական աշխարհի միասնությունը, մեծությունը և ուժը: Անհրաժեշտ է, որ շիաներն ու սուննիները միասնական լինեն: Նրանց հավատքի միջև չկան սկզբունքային տարբերություններ, կան միայն որոշակի տարբերություններ:
Սակայն վերջին ժամանակներս արհեստական ճանապարհով մեծացվում են շիայական և սուննիական հավատքների միջև տարաձայնությունները՝ պառակտելու համար իսլամական ումման (համայնք)»:
Խամենեին անդրադարձել է նաև Սիրիայի հարցին՝ ընդգծելով, որ դրա լուծման համար անհրաժեշտ է արգելել զենքի ներկրումն այդ երկիր. «Սիրիայում, ինչպես և յուրաքանչյուր այլ երկրում, եթե ընդդիմությունն օգտագործում է արտասահմանից բերված զենք, ապա կառավարությունն իրավունք ունի նրա դեմ համապատասխան միջոցներ ձեռնարկել»:
