Տարածաշրջանային հետազոտությունների կենտրոնի տնօրեն Ռիչարդ Կիրակոսյանը ԱՄՆ նախագահական ընտրությունների ազդեցության գնահատման երեք կարևոր ասպեկտ է նշում: Նախ` Միացյալ Նահանգների ընտրությունները մրցակցային էին, բայց այնտեղ կար ընդհանուր վստահություն և հավատ քաղաքական գործընթացների հանդեպ: Բանախոսի խոսքով` փետրվարին կայանալիք հայաստանյան նախագահական ընտրություններում իրավիճակը բոլորովին այլ կլինի: Այլ կերպ ասած՝ Հայաստանի ընտրությունները չեն լինի մրցակցային, բայց Հայաստանի ընտրությունների համար ամենամեծ փորձությունը կլինի այն, թե ինչպես կընթանան ընտրական գործընթացները:
Երկրորդ կարևոր դասը, որ կարող է Հայաստանը քաղել ԱՄՆ-ից, ստրատեգիական ռազմավարական տեսլականն է: Ռիչարդ Կիրակոսյանի խոսքով` Միացյալ Նահանգների քարոզարշավի ժամանակ հիմնականում խոսքը վերաբերում էր այն ռազմավարական տեսլականին, որով թեկնածուները տեսնում էին Միացյալ Նահանգների ապագան:
«Հայաստանում իրավիճակը այլ է, մրցույթը ոչ թե քաղաքականությունների, այլ անձերի միջև է, և Հայաստանում սովորաբար պակասում են ապագայի ռազմավարական տեսլականները»,- ասաց Ռ. Կիրակոսյանը:
Երրորդ կարևոր դասը, նրա դիտարկմամբ, վերաբերում է ամերիկյան ինստիտուցիոնալ ժողովրդավարությանը, քանի որ հենց այդ կառուցվածքներն են երկիրը ավելի հզոր դարձնում, քան անձերը: «Ի տարբերություն Հայաստանի և Վրաստանի քաղաքական գործիչների` հենց ինստիտուտներն են , որ էական դեր են կատարում: Ամերիկյան համակարգն աշխատում է, քանի որ այնտեղ կա փոխադարձ ստուգումների և հաշվետվությունների համակարգ»,- ասաց Ռիչարդ Կիրակոսյանը:
Անդարդառնալով վերջերս Հայաստանի մի քանի կուսակցությունների կողմից խորհրդարական կառավարման մոդելին անցնելու քննարկումներին, Ռ. Կիրակոսյանը նշեց, որ տեսականորեն դա շատ հետաքրքիր է, բայց գործնականում բավական վտանգավոր, որովհետև վստահ չէ, որ Հայաստանի կառավարությունը և այս խորհրդարանը կարող են օպտիմալ կառավարվել: Նրա խոսքով`այսօվա խորհրդարանը էֆեկտիվ չէ:
«Մենք կարիք ունենք ռազմավարական տեսլականի, պլանավորման պատրաստության և գործունեության անհրաժեշտության: Եվ հենց այդ կոնտեքստում տնտեսական խնդիրներն են, որ շատ մեծ դեր են խաղում: Հենց տնտեսությունն է, որ ազգային գոյության բանալին է հանդիսանում»:
Ռիչարդ Կիրակոսյանը նշեց, որ շատ երկար ժամանակ Հայատանում քաղաքականությունը որոշվել է կոնկրետ անձնանց կողմից, և ներկայիս քաղաքականությունն էլ սահմանափակում է երեք նախագահներով: Քաղաքականությունը, ըստ նրա, շատ հաճախ մեզանում վերածվում է հայտնիության մրցավազքի անձերի միջև, բայց չկա գաղափարների առողջ մրցավազք:
