Իրանական IRNA լրատվական գործակալության փոխանցմամբ՝ Կասպից ծովի իրավական կարգավիճակի հարցը քննարկվելու է դեկտեմբերի 14-15-ը Մազանդարան նահանգի Սարի քաղաքում կայանալիք կոնֆերանսի ժամանակ: Դրանում հստակեցվելու է նաև այն, թե Կասպից ծովի որչափ մասը պետք է համարվի իրանական:
Այս մասին հայտարարել է Կասպից գծով խորհրդարանական հանձնաժողովի ղեկավար Մեհդի Սենաին: Ակնկալվում է, որ կոնֆերանսին մասնակցելու են Իրանի արտգործնախարար Ալի Աքբար Սալեհին, կառավարության և խորհրդարանի անդամներ:
Հիշեցնենք, որ դեռևս 1970 թվականին ԽՍՀՄ նավթարդյունաբերության նախարարության կողմից իրականացվել է ազգային սեկտորների հիման վրա Կասպիցի բաժանման պրակտիկան: Համաձայն այդ բաժանման՝ Ադրբեջանին բաժին է հասել Կասպից ծովի տարածքի մոտ 70,000 կիլոմետր քառակուսի, Թուրքմենստանին` 80,000 կիլոմետր քառակուսի, Ռուսաստանին` 60,000 կիլոմետր քառակուսի, Ղազախստանին` 105.000 կիլոմետր քառակուսիև Իրանին` 55.000 կիլոմետր քառակուսի:
Այն ժամանակ պաշտոնական Թեհրանը Կասպիցի այդպիսի բաժանման հարցում որևէ դժգոհություն չէր արտահայտել: Մինչդեռ ներկայումս Իրանը պահանջում է Կասպից ծովի 20 տոկոսը՝ համարելով, որ Կասպից ծովը պետք է հավասարաչափ բաժանվի մերձկասպյան 5 երկրների միջև:
