Էներգետիկայի նախկին նախարար Արմեն Մովսիսյանը, ում պաշտոնավարման ժամանակ է որոշում կայացվել Ատոմակայանի աշխատանքի դադարեցման ժամկետների մասին, և ով այժմ նախագահի խորհրդականն է, երեկ «Ժամանակի» հարցին ի պատասխան ասաց, որ հիմնավոր է համարում էլեկտրաէներգիայի թանկացումը, սակայն հրաժարվեց այդ առթիվ հնչած մեղադրանքներին պարզաբանում տալ: Հայաստանի ատոմակայանի տնօրեն Գագիկ Մարկոսյանի հետ չհաջողվեց խոսել:
Հիշեցնենք, որ օգոստոսի 1-ից էլեկտրաէներգիան 3.85 դրամով թանկացնելու պատճառը, ըստ Հանրային ծառայությունները կարգավորող հանձնաժողովի նախագահ Ռոբերտ Նազարյանի, այն է, որ ատոմակայանը նախատեսվածից շուրջ երեք ամսով ավելի երկար է վերազինվել՝ դադարեցնելով աշխատանքը, բացի այդ` տարին սակավաջուր է եղել, հիդրոէլեկտրակայանները քիչ հոսանք են արտադրել:
Էլեկտրաէներգիան թանկացնելու վերաբերյալ այս բացատրությունները լուրջ դժգոհության առիթ են տվել թե հասարակության շրջանում, թե հարուցել են ոչ իշխանական պատգամավորների զայրույթը: Վերջիններս ԱԺ-ում հարց բարձրացրեցին, թե ինչո՞ւ պետք է էլեկտրաէներգիա արտադրող կազմակերպությունների ապաշնորհ կառավարման հետևանքով առաջացած ֆինանսական ճեղքվածքը փակի շարքային սպառողը:
Ի դեպ, «Հայկական ԱԷԿ-ի N 2 էներգաբլոկի շահագործման նախագծային ժամկետի երկարացման ծրագրի հաստատման մասին» ՀՀ կառավարության որոշման համաձայն` դեռևս անցյալ տարի կառավարությունը հանձնարարել էր Էներգետիկայի նախարարությանը հանրային ծառայությունները կարգավորող հանձնաժողովի նախագահ Ռ. Նազարյանի հետ համատեղ հաշվարկել 350.0 մլն դրամ արժողությամբ, 7 տարի շահագործման ժամկետ ունեցող «Հայկական ատոմային էլեկտրակայան» ՓԲԸ-ի 2-րդ էներգաբլոկի արտադրած էլեկտրաէներգիայի սակագինը և այն ներկայացնել ՀՀ կառավարության աշխատակազմ:
Այսինքն՝ էլեկտրաէներգիայի փոփոխության ռիսկերի մասին պետք է հայտնի լիներ դեռ անցյալ տարի: Ըստ Էներգետիկայի նախարարության հաշվետվության, հանրային ծառայությունները կարգավորող հանձնաժողովի հետ համատեղ հաշվարկվել է արտադրվող էլեկտրաէներգիայի սակագնի փոփոխությունը՝ Հայկական ԱԷԿ-ի շահագործման նախագծային ժամկետը 7 և 10 տարի երկարացնելու դեպքում: Այստեղ որևէ խոսք չկա էլեկտրաէներգիայի թանկացման անհրաժեշտության մասին:
Հայկական ԱԷԿ-ի 2-րդ էներգաբլոկի շահագործման նախագծային ժամկետի երկարաձգման ծրագրի առաջին փուլը նախատեսվում է ավարտել 2014 թվականի դեկտեմբեր ամսին: Նշենք, որ հայկական ԱԷԿ-ի շահագործման նախագծային ժամկետը կերկարացվի 15 տարով:
«Հասարակական պաշտպանների միություն» ՀԿ-ի գործադիր տնօրեն Արամ Գրիգորյանը երեկ հայտարարել է, որ Հայաստանի բնակչությանը պարզ չէ, թե ինչ հիմքով է Հանրային ծառայությունները կարգավորող հանձնաժողովը գտել, որ էլեկտրաէներգիայի սակագինը պետք է բարձրանա: «Բաշխիչ ցանցը պարտք կուտակելու ոչ իրավունք ունի, ոչ էլ հնարավորություն, որովհետև բաշխիչ ցանցի համար հաշված սակագնում նախատեսված է հսկայական շահույթ, ու դա հավաքվում է: Ամենահեշտ կառավարման ձևն է՝ ոչինչ չանել, պատճառների մասին չխոսել, հետևանքները վերացնելու համար գնալ, մտնել սպառողի գրպանը ու ասել՝ դու պետք է շատ վճարես»,- ասել է փորձագետը՝ շարունակելով. «Ընկերությունը ոչ արդյունավետ է կառավարվում, պետությունը մտնում է սպառողի գրպանը, ընկերությունն իր ֆինանսներն այլ տեղեր է օգտագործում, մեր պետությունը դարձյալ բացը լրացնում է սպառողների հաշվին»: Փորձագետն ընդգծել է, որ չի կարելի է սակագնի բարձրացում թույլ տալ, քանի դեռ պետությունը հիմնավորված չի ներկայացրել դրա անհրաժեշտությունը:
Լուսանկարը՝ Photolure-ի