Վենեսուելայի իշխանությունները, առանց ԱՄՆ-ի աջակցության, 2012 թ. ընթացքում ձերբակալել են 18 նարկոբարոնի: Ինչպես հաղորդում է RIA Novosti-ն, այս մասին հայտարարել է Վենեսուելայի ներքին գործերի նախարար Նեստոր Ռևեռոլյան:
Նախարարը նշել է, որ Վենեսուելան թմրանյութերի դեմ պայքարի համատեղ ծրագիր ունի հարևան Կոլումբիայի հետ, ինչի շնորհիվ ձերբակալվել է խոշոր հանցավոր խմբավորումների 18 առաջնորդ: «Օրեր առաջ մենք Կոլումբիային փոխանցել ենք երկու խոշոր թմրավաճառների, ընդ որում, առանց արտասահմանյան օգնության»,- նշել է նախարարը:
Ռևեռոլյան ընդգծել է, որ Վենեսուելան դադարեցրել է թմրանյութերի շրջանառության դեմ պայքարի 14 համաձայնագրի գործունեությունը ԱՄՆ-ի հետ այն բանից հետո, երբ վերջինս Վենեսուելայի մի շարք բարձրաստիճան պաշտոնյաների մեղադրել է թմրանյութերի վաճառքում մասնակցություն ունենալու մեջ: Դրա փոխարեն, երկիրը համագործակցում է 38 այլ պետությունների հետ:
«Վենեսուելան որևէ խորհրդակցության, որևէ տնտեսական օգնության կարիք չունի ԱՄՆ-ի կողմից (թմրանյութերի շրջանառության դեմ պայքարում)»,- նշել է նախարարը:
Նախարարի տեղեկատվության համաձայն՝ վերջին վեց տարիների ընթացքում Վենեսուելայում, ընդհանուր առմամբ, ձերբակալվել է 93 նարկոբարոն:
