Մոտ ապագայում Սիրիական ընդդիմության ազգային կոալիցիան ևս չի միավորի ընդդիմության գործողությունները. «Առաջին լրատվական»-ի հետ զրույցում նման կարծիք հայտնեց AL Khabar սիրիական հեռուստակայանի գլխավոր խմբագիր Սարգիս Քասարջյանը՝ խոսելով ընդդիմության ազգային կոալիցիայի ձևավորման մասին:
Նա նշեց, որ Սիրիայում ընդդիմության ազգային կոալիցիայի ձևավորումը երկու նպատակ ուներ: Նրա խոսքով` առաջինն այն է, որ կասեցվի Ստամբուլում կազմված ընդդիմադիր միության քաղաքական գործունեությունը, և այդ միությունը զրկվի քաղաքական գործունեության իրավասությունից, որը մինչ այս համարվում էր սիրիական ընդդիմադիր ճակատների միակ ներկայացուցիչ և երկխոսության իրավասու կողմ:
«Այսօր արդեն հստակ է, որ եվրոպական միությունները և տարածաշրջանի արաբական երկու մեծ ուժերը ուզում են այդ ընդդիմադիր մարմնից վերցնել այդ իրավունքները և հանձնել այլ մարմնի, որն ինչ-որ ձևով կարծես Թուրքիայի շատ հզոր դերը այդ ձևով կկասեցնի»,- պարզաբանեց Սարգիս Քասարջյանը:
Երկրորդ նպատակն, ըստ նրա, այն է, որ տարածաշրջանի հզոր արաբական պետությունները փորձում են կազմել նոր առաջնորդներով միություն:
Նրա համոզմամբ՝ այսօր Սիրիայում ընդդիմության մեջ բացակայում է քաղաքական ու ռազմական գործողությունների համագործակցությունը: Ուստի, սիրիահայի կարծիքով, եթե այդ համագործակցությունը լինի, և եթե այդ կապը լավ ձևով ներկայանա, առաջիկայում այդ միությունը կարող է ներկայանալ իբրև քաղաքական և ռազմական գործողությունների միակ պատասխանատու:
«Լարվածության խորացման մասին խոսել հնարավոր չէ, որովհետև մինչ այս ժամը Սիրիայում աշխատող այդ զանազան խմբավորումների միջև համագործակցության նշաններ չկան: Նույնիսկ երբ քաղաքական կողմերը հայտարարություն արեցին քառօրյա զինադադարի մասին, որևէ կերպ դա չիրագործվեց, որովհետև ճակատները չէին համագործակցում: Կարծում եմ, որ այդ համագործակցությունը դեռ հեռու է, որովհետև սիրիական հարցում կան բազմաթիվ ակտիվ երկրներ, որոնք ունեն իրենց օրակարգը, իսկ այդ օրակարգն իրագործելու համար ունեն հատուկ խմբավորումներ»,- հստակեցրեց Սարգիս Քասարջյանը:
Անդրադառնալով Ֆրանսիայի պատրաստակամությանը` օգնելու զինյալ ապստամբներին, նա ասաց, որ մինչ այդ հայտարարությունները արդեն գոյություն ուներ աջակցություն: Իսկ վերջին հայտարարությունները, նրա խոսքով, պարզապես քաղաքական պրոպագանդայի նպատակով են արվում:
Հիշեցնենք, որ նոյեմբերի 11-ին Դոհայում ներկա ընդդիմադիրները ստորագրել էին Հեղափոխական ուժերի և ընդդիմության ազգային կոալիցիայի ստեղծման մասին համաձայնագիր, որը պետք է ներկայացնի Սիրիայի նախագահ Բաշար Ասադի հակառակորդների շահերը: Ազգային կոմիտեի ղեկավար է ընտրվել մուսուլման հայտնի քարոզիչ Ահմեդ Աուազ Ալ-Խաթիբը: Իսկ Ֆրանսիան պատրաստակամություն էր հայտնել նպաստելու ընդդիմության ազգային կոալիցիայի միջազգային ճանաչմանը:
