Այսօր՝ նոյեմբերի 18-ին, սպանություն է տեղի ունեցել Լոռու մարզում: Ժամը 21:00-ի սահմաններում, Ոստիկանության Վանաձորի բաժին ահազանգ է ստացվել, որ Վանաձոր քաղաքի Նարեկացի 24/1 հասցեում վիճաբանություն է տեղի ունեցել, ինչի արդյունքում մահացած անձ կա:
Ինչպես հայտնում է shamshyan.com-ը, նշված հասցե են մեկնել Ոստիկանության Լոռու մարզային վարչության օպերատիվ խումբը՝ վարչության պետ Անուբախ Ղամբարյանի գլխավորությամբ: Տեղում են եղել նաև Ոստիկանության Վանաձորի բաժնի օպերատիվ խումբը՝ Վանաձորի ոստիկանապետ Էրիկ Շարմազանովի գլխավորությամբ:
Այս պահին դեպքի վայրում աշխատում են Ոստիկանության քննչական գլխավոր վարչության Լոռու մարզի քննչական բաժնի քննիչները՝ բաժնի պետ Թաթուլ Շուշանյանի գլխավորությամբ: Օպերատիվ քննչական խումբը պարզել է, որ կենցաղային հարցերի շուրջ ծագած վիճաբանության ժամանակ 38-ամյա Տարոնուհի Ավետիսյանը դանակի մի քանի հարվածով սպանել է իր եղբորը՝ 45-ամյա Գարեգին Ավետիսյանին:
Քննչական խումբը նշված սպանության վայրում, որը վագոն-տնակ է, առգրավվում է հանցագործության գործիք դանակը, իսկ դատաբժիշկը դիակի նախնական զննում է կատարում: Արդեն քննչական բաժնում հարուցվել է քրեական գործ՝ ՀՀ Քրօր-ի 104 հոդվածի (սպանություն) հատկանիշներով:
Վանաձորի ոստիկանները եղբորը սպանած քրոջը տեղափոխել են ոստիկանության Վանաձորի բաժին:
