Սիրիայի հեղափոխական և ընդդմադիր ուժերի ազգային կոալիցիայի ղեկավար շեյխ Ահմեդ Մուազ Ալ-Խատիբը հավաստիացրել է, որ երկրի էթնիկական և կրոնական փոքրամասնությունները, առաջին հերթին` քրիստոնյաներն ու ալավիները, անմիջական մասնակցություն կունենան «ապագա Սիրիայի» քաղաքական կյանքին:
Ինչպես հաղորդում է ITAR-TASS-ը, նման հայտարարությամբ հանդես է եկել Ֆրանսիայի նախագահ Ֆրանսուա Օլանդը Ալ-Խատիբի հետ հանդիպումից հետո:
Ֆրանսուա Օլանդի խոսքով` Սիրիայի ընդդիմության ազգային կոալիցիայի ղեկավարը երաշխավորել է, որ քրիստոնյաները և ալավիները մասնակցություն կունենան ժողովրդավարական Սիրիայի ապագա կառույցներում:
Ալ-Խատիբը նշել է, որ որևէ խոչընդոտ չի տեսնում Սիրիայում անցումային կառավարության ստեղծման համար: «Այս հարցում խնդիրներ չկան: Կոալիցիան ստեղծված է, և մենք մոտակա ժամանակներս կքննարկենք թեկնածուների հարցը տեխնիկական կառավարության ձևավորման համար, որը կաշխատի մինչև Բաշար Ասադի վարչակարգի տապալումը»,- ասել է Ալ-Խատիբը:
Հիշեցնենք, որ Ֆրանսիան Սիրիայի հեղափոխական և ընդդիմադիր ուժերի ազգային կոալիցիան ճանաչել է որպես սիրիացի ժողովրդի միակ օրինական ներկայացուցիչ:
