Ընդդիմության կողմից Ազատության հրապարակը ազատագրելը Գալուստ Սահակյանի համար ամպագոռգոռ արտահայտություն է, որը ինքը չի սիրում։
«Պարզապապես ոստիկանները խնդրանքը ապահովեցին, և ես այստեղ քաջագործություն չեմ տեսնում։ Ընդհանուր առմամբ, նոր եմ թերթերը թերթում և ինֆորմացված չեմ, որ ասեմ՝ ինչը որից հետո է։ Իսկ իշխանությունները իրենց ծրագրերի իրագործման ճանապարհին են։ Ինչ վերաբերում է ընդդիմության պահանջներին, բոլորիս պահանջները նույնը կարող են լինել»,- մեզ հետ զրույցում անդրադառնալով ընդդիմության երեկվա հանրահավաքին՝ ասաց Գալուստ Սահակյանը։
Մեր հարցին՝ դա ենթադրո՞ւմ է, որ, այնուամենայնիվ, երկխոսություն կսկսվի այդ պահանջների շուրջ, և ի՞նչն է խանգարում երկխոսություն սկսելուն, Գալուստ Սահակյանը պատասխանեց. «Նախևառաջ, այդ երկխոսության կոչերը մենք ենք արել և միշտ էլ ցանկացած ուժի հետ պատրաստ ենք երկխոսել։ Բայց, կարծում եմ, ճիշտ կլինի, որ նախ ընդդիմության դաշտը իրենց ներսում երկխոսի, տեսնենք՝ ի՞նչ որակ են ստանում։ Իսկ որպեսզի երկխոսությունը սկսվի, պարզապես բարի կամքի դրսևորում է անհրաժեշտ, ինչը չունի ընդդիմությունը»։