2013 թ. հուլիսի 1-ից, ամենայն հավանականությամբ, Հայաստանում կգործեն ներտնային գազասպասարկման նոր սակագներ: Նախաձեռնությունը Հանրային ծառայությունները կարգավորող հանձնաժողովինն է: Օրերս հանձնաժողովում համակարգի տեխնիկական սպասարկման վճարների վերանայման հարցով քննարկում է անցկացվել, որի ժամանակ ՀԾԿՀ-ն շահագրգիռ կողմերին է ներկայացրել իր հաշվարկները: Ինչպես «Առաջին լրատվական»-ին հայտնեց ՀԾԿՀ Լիցենզավորված գործունեության մոնիթորինգի և ներդրումային ծրագրերի վարչության պետ Աբգար Բուդաղյանը, քննարկումները դեռ շարունակվում են, դրանց ամփոփումից հետո, հավանաբար մոտ 2 շաբաթից կրկին հանրային քննարկում կհրավիրվի:
Ըստ նրա՝ հնարավոր է սակագնի փոփոխություն՝ և՛ բարձրացման, և՛ նվազման ուղղությամբ. «Մենք ինքներս ենք գնահատել՝ ծառայության արժեքը որքան պետք է կազմի, սակայն վերջնական որոշումից առաջ պետք է լսենք կողմերին և, եթե առարկություն չունենան, նիստում կհաստատենք»,- ասաց Ա. Բուդաղյանը՝ հավելելով, որ ՀԾԿՀ-ի նախատեսած փոփոխություններով սակագները պետք է նվազեն, բայց թե որքան՝ կախված է գազօգտագործող սարքավորումների քանակից:
ՀԾԿՀ տվյալներով՝ ներկայում ՀՀ-ում կա 587 հզ. 517 գազասպառող բաժանորդ, որի 8.6 %–ն ունի 1 գազօգտագործող սարքավորում, 60.5 %-ը՝ 2, իսկ 30.9 %-ը՝ 3 և ավելի: Ներկայում, ըստ գազօգտագործող սարքավորումների քանակի, սպասարկման վճարները սահամանված են 1-ի դեպքում 2400 դրամ (ներառյալ ԱԱՀ), 2-ի դեպքում՝ 5700 դրամ, 3 և ավելիի դեպքում՝ 6900 դրամ:
ՀՀ կառավարության աջակցությամբ «Հայռուսգազարդի» կողմից ներտնային գազասպասարկման ոլորտում մենաշնորհ ունեցող «Էյ-Ի-Ջի Սերվիս» ընկերության համար ՀԾԿՀ-ն նախատեսում է 12 % շահութաբերություն (264.3 մլն դրամ):
Նշենք, որ ներկայում ընկերության կայքում առկա ֆինանսական հաշվետվության համաձայն՝ «Էյ-Ի-Ջի Սերվիս»-ը, կարելի է ասել՝ վատ չի աշխատում. 2009-ին ընկերության տարեկան շահույթը կազմել է 345.6 մլն դրամ, իսկ 2010-ին՝ մոտ 440.8 մլն դրամ:
Մնում է, որ «Հայռուսգազարդը» համաձայնի ապագայում իր «դստրիկի» շահույթի նվազեցման հետ:
