ԱԺ ՕԵԿ խմբակցության քարտուղար Մհեր Շահգելդյանը հունիսի 9-ին «ՀՀ և Եվրոպական ներդրումային բանկի միջև 2013-ի նոյեմբերի 7-ին և 2013-ի նոյեմբերի 18-ին ստորագրված «ՀՀ «Հյուսիս- Հարավ» ճանապարհային միջանցք» » ֆինանսական պայմանագրի քննարկման ժամանակ ուշադրություն հրավիրեց մի քանի խնդրի վրա: Պատգամավոր նշեց, որ իր գործընկերների կողմից բարձրացվող հիմնահարցերը շատ ավելի լայն բնույթ են կրում, քան կարող է պատասխանել Տրանսպորտի և կապի նախարարությունը, քանի որ դրանք ընդհանուր Հայաստանի զարգացմանն են վերաբերում և տնտեսությանը:
Շահգելդյանն առանձնացրեց վերադարձելիության խնդիրը, նշեց, որ այս դեպքում պարտավորությունների մի մասն ընկնելու է հաջորդ սերնդի` մեր երեխաների վրա, ապա հետաքրքրվեց` որո՞նք են լինելու վճարման մեխանիզմները, ի՞նչ կանխատեսումներ կան: «Որքան ես եմ ծանոթ` մենք այստեղ խնդիրներ ունենք: Այն տարածաշրջանների համար, որտեղով անցնելու է ճանապարհը, ինչպիսի՞ պոտենցիալ զարգացման հնարավորություններ են լինելու: «Հյուսիս – Հարավ»-ը կարևոր է Հայաստանի զարգացման համար, ինձ հասած տեղեկություններով` ավելի հարավ ձգվող ճանապարհը, որին մենք կարող ենք միանալ, ունի երկընտրանք. ուղիներից մեկն այսօր անցնում է Աֆղանստանով, այն Աֆղանստանով, որն անկայուն է: Որքանո՞վ կարող ենք մենք հաշվարկել` ինչպիսին կլինեն ճանապարհները»,- ասաց նա:
Շահգելդյանը նշեց, որ Գյումրին ունի ճանապարհային հանգույց դառնալու բավականաչափ պոտենցիալ` օդանավակայան, որ աշխատում է ոչ մեծ ծանրաբեռնվածությամբ, երկաթուղին, որ տարածաշրջանային փոփոխությունների տրամաբանությամբ կարող է աշխատել, և այս ճանապարհի հստակ գործունեության առկայությունը կարող է Գյումրին ռեալ ճանապարհային հատվածի վերածել, Վրաստանի հետ բեռնափոխադրումների ակտիվացմանը զարկ տալ: