Գործարար, «Հին Էրիվան» ռեստորանային հոլդինգի սեփականատեր Մանվել Տեր-Առաքելյանը նախօրեին հանդիպել էր վարչապետ Հովիկ Աբրահամյանի հետ և ներկայացրել իր բիզնեսը խլելու՝ 3 տարի շարունակվող գործընթացը:
Հիշեցնենք, որ «Հին Էրիվանը» և «Յունիբանկը» տարիներ շարունակ դատական գործընթացների մեջ են: «Հին Էրիվանի» սեփականատեր Մանվել Տեր-Առաքելյանը, «Յունիբանկում» գրավադնելով ռեստորանային համալիրը, վարկ էր վերցրել: Ավելի ուշ, սակայն, բանկը, վարկային պարտավորությունները չկատարելու պատճառաբանությամբ, փորձեց տիրանալ ռեստորանային համալիրին: Մանվել Տեր-Առաքելյանը, սակայն, պնդում է, որ ինքը վարկային պարտավորությունների հետ կապված խնդիր չի ունեցել, և այս ամբողջ գործընթացը նախապես պլանավորված, բիզնեսի խլման գործընթաց է:
Հովիկ Աբրահամյանը համոզվե՞ց, որ իրականում խլման գործընթաց է գնում՝ հարցրինք գործարարից: «Մենք մանրամասն փաստական տվյալներ ներկայացրինք, բայց վարչապետն ասաց, որ պետք է երկկողմանի ուսումնասիրի խնդիրը և միայն իմ ներկայացմամբ չի կարող վերջնական համոզման գալ: Բայց Հովիկ Աբրահամյանը, լսելով ամբողջ պատմությունը, մտահոգվեց, զարմանք հայտնեց և խոստացավ խնդիրը վերցնել իր վերահսկողության տակ: Ընդհանրապես, իր դիրքորոշումն այնպիսին էր, որ ոչ թե միայն «Հին Էրիվան», «Յունիբանկ», այլ ընդհանրապես բոլոր խնդիրները: Նա ասաց, որ ընդհանրապես «խլել» բառը պետք է դուրս գա հայկական բառապաշարից, և ինքն ամեն ինչ կանի դրա համար: Ասաց, որ «խլոցի» չպետք է լինի այլևս»,- «Առաջին լրատվական»-ի հետ զրույցում ասաց Մանվել Տեր-Առաքելյանը:
Նրանից հետաքրքրվեցինք՝ երբ գործը դատարանում է, արդյոք վարչապետի ներգրավվածությունը չի՞ դիտվի որպես միջամտություն դատարանի գործերին: Տեր-Առաքելյանի խոսքով, սակայն, գործը հիմա դատարանում չէ, հիմա սնանկացման գործընթաց է գնում, իսկ ինքը Հովիկ Աբրահամյանից միայն մի բան է խնդրել. հետևել, որպեսզի գործը վերցնեն դատական վարույթ, որի արդյունքում ի հայտ կգան մեղավորները:
«Սա միջամտություն չէ, բնականաբար: Եթե գործը լիներ դատարանի վարույթում, և ես բարձրաձայնեի դրա մասին, ապա դա կլիներ միջամտություն: Իսկ հիմա խնդրում ենք, որ վճռաբեկ դատարանը գործը վարույթ ընդունի և բացահայտի մեղավորներին: Այդ ժամանակ կպարզվի, որ մենք բարեխիղճ վարկառու ենք, ոչ մեկից գումար չենք խնդրում: Մեր միակ պահանջն այն է, որ «Հին Էրիվան» հոլդինգին ճանաչեն բարեխիղճ, ոչ ժամկետանց վարկառու»:
Գործարարը ամեն ինչ անում է բարեխիղճ վարկառու ճանաչվելու համար, քանի որ հակառակ դեպքում իրեն հատկապես դրսում լուրջ գործարար չեն համարի: «Եթե գործարարը ժամկետանց վարկառու է ճանաչվել, ապա դա դատվածության պես բան է նրա համար: Ֆինանսական հեղինակությունը ամենամեծ բանն է գործարարի համար, հետևաբար դա ինձ համար ավելի կարևոր է, քան փողը: Ես ոչ մեկից ոչ փող եմ խնդրում, ոչ էլ աջակցություն: Արդարադատությունն էլ պահանջում ենք միայն նշված շրջանակում»,- եզրափակեց գործարարը:
Եթե Հովիկ Աբրահամյանը սկսել է աջակցել «քցված» գործարարներին և խոստումներ է տալիս աջակցել, վերադարձնել նրանց «խլված» բիզնեսը, ապա պետք է Մանվել Տեր-Առաքելյանից բացի հանդիպի նաև խնամուց՝ Գագիկ Ծառուկյանից քցված գերմանացի գործարար, «ԻստԻնվեստոր» ընկերության տնօրեն Ստեֆան Լաքսհուբերի հետ: Վերջինս, հիշեցնենք, Ծառուկյանին պատկանող «Երևանի «Արարատ» կոնյակի-գինու-օղու կոմբինատ»-ի 3.5 տոկոսի բաժնետեր էր, սակայն հիմնական սեփականատերը Լաքսհուբերից խլեց նրա բաժնեմասը, վերջինս էլ ստիպված հեռացավ Հայաստանի՝ց մինչ օրս Ծառուկյանի հետ մնալով դատական վեճերի մեջ:
Հովիկ Աբրահամյանը պետք է հանդիպի նաև ամերիկահայ ներդրող Էդմոն Խուդյանի հետ, ում ընկերությունը դիտմամբ հասցվեց սնանկացման՝ գործարարին պատճառելով միլիոնավոր դոլարների վնաս: Խուդյանը ևս մինչ օրս անհեռանկար դատական վեճերի մեջ է հայաստանյան դատական համակարգի հետ:
Աբրահամյանը պետք է հանդիպի մեկ այլ հայտնի «քցված» ֆրանսահայ գործարար Վալերի-Աշխեն Գործունյանի հետ, որին հարկային տեռորի ենթարկելու ճանապարհով ստիպեցին վաճառել սրճարանն ու հեռանալ Հայաստանից:
Այս շարքը կարելի է շատ երկար թվարկել: Նշված անձանց հետ, և ոչ միայն, առանձին հանդիպելուց, նրանց ունեցվածքը վերադարձնելուց հետո միայն կարելի է ասել, որ Հովիկ Աբրահամյանի ցանկությունը՝ դադարեցնել «խլոցին», ազնիվ է: