«Լիվերպուլ»-ի և Անգլիայի հավաքականի կիսապաշտպան Սթիվեն Ջերարդը նշել է, որ արդեն երկար տարիներ է, ինչ հանդիսանում է «Յուվենթուս»-ի ու Իտալիայի ընտրանու ֆուտբոլիստ Անդրեա Պիրլոյի տաղանդի վաղեմի երկրպագուն:
Այս երկու հավաքականները կհանդիպեն 2014 թվականի աշխարհի առաջնության խմբային փուլի առաջին տուրի մրցավեճում: Հանդիպումը կկայանա հունիսի 15-ին, Երևանի ժամանակով 02:00-ին:
«Ես Պիրլոյի տաղանդի վաղեմի երկրպագուն եմ: Նույնիսկ երբ հանդես էի գալիս հարձակվողական ոճի կիսապաշտպանի դիրքում, ուղղակի անհնար էր չհիանալ փլեյմեյքեր Պիրլոյի փայլուն գործողություններով:
Ինձ թվում է, որ նա տարեցտարի ավելի ու ավելի լավն է դառնում: Անդրեան ներկա պահին գտնվում է հիանալի մարզավիճակում: Կարևոր է նրան չտալ տարածություն և ժամանակ` որոշումներ կայացնելու համար: Նա կարող է բեկել ցանկացած հանդիպման ընթացք. դա եզակի ունակություն է: Մեր թիմը Պիրլոյին վերաբերվում է անսահման հարգանքով»,- Ջերարդի խոսքերը մեջբերում է ՖԻՖԱ-ի պաշտոնական կայքը:
