Ոստիկանապետի տեղակալ, ոստիկանության գեներալ-մայոր Արթուր Օսիկյանի գլխին մութ ամպեր են կուտակվում: Պատճառը Անձնագրային և վիզաների վարչությունում բացահայտված աղաղակող խախտումներն են, որի պատճառով նշված վարչության պետի՝ Նորայր Մուրադխանյանի երկու տեղակալները՝ Արսեն Համբարձումյանն ու Մուշեղ Խաչատրյանն ազատվել են աշխատանքից և ուղարկվել կադրերի ռեզերվ: Իսկ Մուրադխանյանի հետագա պաշտոնավորման հարցը արդեն իսկ կասկածի տակ է:
«Առաջին լրատվական»-ի տեղեկություններով՝ այդ խախտումները հայտնաբերվել են վերջին օրերին ոստիկանապետ Վլադիմիր Գասպարյանի հրամանով Անձնագրային և վիզաների վարչությունում իրականացված ստուգումների արդյունքում: Խախտումները ամենատարբեր բնույթի են եղել՝ սկսած տեղեկանքների կեղծված լինելուց, վերջացրած քաղաքացիների դիմումներն ամիսներ շարունակ անարձագանք թողնելով: Մուրադխանյանը մեզ հետ զրույցում ասաց, որ Արսեն Համբարձումյանը գործուղման մեջ է գտնվում, իսկ Մուշեղ Խաչատրյանի մասով ինքը դեռ հրաման չի ստացել: «Նրանցից երկուսից էլ աշխատանքից ազատման դիմումներ չեն եղել»,- ասաց Մուրադխանյանը:
Ինչ վերաբերում է վարչությունում իրականացված ստուգումներին, վարչության պետն ասաց, որ սահմանված կարգով, պարբերաբար բոլոր վարչություններում էլ ստուգումներ իրականացվում են: Մուրադխանյանը հրաժարվեց պատասխանել մեր մյուս հարցերին՝ մատնացույց անելով ոստիկանության լրատվական ծառայությանը, որտեղից, ի տարբերություն Մուրադխանյանի, չհերքեցին տեղեկությունը՝ նշելով, որ անձնագրային ծառայությունում կառուցվածքային և կադրային փոփոխություններ են իրականացվում: Ինչ վերաբերում է ստուգումներին, ապա հասարակայնության հետ կապերի վարչության պետ Աշոտ Ահարոնյանը տվեց նույն պատասխանը. «Ոստիկանության ստորաբաժանումներում մշտապես պլանային ստուգումներ իրականացվում են»:
Նշենք, որ մեր տեղեկություններով՝ իրականացվող կառուցվածքային փոփոխությունները ոչ պակաս ուշագրավ են: Առաջիկայում տարածքային անձնագրային բաժանմունքները ապակենտրոնացվելու են և գործելու են ոստիկանության բաժինների ենթակայությամբ, ինչպես նախկինում էր: Անձնագրային վարչությունում մնալու է մոտ 120 հոգի, որոնք զբաղվելու են բացառապես քաղաքացիության, վիզաների, օտարերկրացիների հարցերով, իսկ բուն աշխատանքով զբաղվելու են տարածքային, մարզային «պասպորտսեղանները»: Ընդ որում` այս փոփոխությունը վերաբերում է ոչ միայն անձնագրային ծառայությանը, այլև պետական պահպանության գլխավոր վարչությանը:
Ի պատասխան մեր հարցին` ինչո՞վ են պայմանավորված փոփոխությունները, Ահարոնյանը կարճ ասաց. «Այս կադրային և կառուցվածքային փոփոխությունները պետք է դիտարկել բարեփոխումների շրջանակում»:
Նշենք, սակայն, որ այս ամենը բնավ չի խոսում բարեփոխումների մասին: Եթե մի քանի տարի շարունակ իրականացվող բարեփոխումներից, միջազգային կառույցների (և ոչ միայն) տրամադրած միլիոնավոր դրամներից, շենքային պայմանների բարելավումից և այլ քայլերից հետո անցում ենք կատարում նախկին համակարգին, այս ամենը խոսում է միայն մեկ բանի մասին, որ ձեռնարկված բարեփոխումները պարզապես ձախողվել են:
