Այսօր ՀՀ պաշտպանության նախարարի հրամանով նախարարին առընթեր հասարակական խորհրդի հովանու ներքո ստեղծված ամառային զորակոչի ընթացքում քաղաքացիների դիմումների և բողոքների քննարկման հանձնաժողովի առաջին նիստը անցավ լարված մթնոլորտում:
Հանձնաժողովն արդեն քառասուն դիմում է ստացել:
Ակնալիճից եկել էր Արթուր Վարդանյանը մոր՝ Օվսաննայի հետ: Դիմումում մայրը խնդրում էր թողնել որդուն տանի բուժման, որից հետո նոր գնա ծառայության:
«Բժիշկներն ասել են, որ վիրահատման է ենթակա, կանչել են զորակոչի: 11 տարեկանում երեխայի աջ աչքը արմատուրա է մտել, որից հետո հիմա վիզն էլ ծուռ է, իսկ թեքվելիս կրկնակի է տեսնում: Թող երեխային օգնություն ցույց տան, հետո նոր տանեն ծառայության: Իմ մյուս որդին ծառայում է, իսկ այս մեկը հիվանդ է, այս վիճակով բանակ տանելն անարդարացի է»,- գրված էր դիմումում:
Մայրը պատմեց, որ տարիներ առաջ ՝ 11 տարեկանում, վնասվել է որդու աջ աչքը: Անհապաղ վիրահատություն են նշանակել, բայց գումար չլինելու պատճառով չեն վիրահատել: Հանձնաժողովի նախագահ, հասարակական խորհրդի նախագահ, պաշտպանության նախարարի խորհրդական Գեղամ Հարությունյանը նշեց, որ նրան պետական պատվերով վիրահատություն է հասնում:
Հանձնաժողովը պահանջեց, բացի կենտրոնական բժշկական հանձնաժողովի եզրակացությունից, որևէ հետազոտություն ներկայացնեն:
«Չունենք, բայց մենք գիտենք, որ մեզ վիրահատություն է պետք, աչքի նյարդաթելը կտրված է»,- ասաց մայրը՝ հավելելով, որ երեխան վիզը թեքում է, կրկնակի է տեսնում, ինչպե՞ս պետք է զենքը ձեռքը տան և ասեն՝ կրակի:
«Ես միայն ինձ եմ հավատում, ես ոչ մեկին չեմ հավատում: Ինձ ժամանակ տվեք, ես վարկ վերցնեմ, վիրահատեմ, նոր գնա բանակ: Շանս տվեք, ես վարկ վերցնեմ, վիրահատեմ երեխայիս»,- ասաց Օշվսաննան:
Հանձնաժողովում քննվեցին փաստաթղթերը: Ակնագնդի հստակ արտահայտված տատանվող սպազմ, շլությունը մինչև քսան աստիճան, պիտանի է ծառայության, մինչդեռ Արթւոր Վարդանյանի դեպքում 10 է:
Կենտրոնական բժշկական հանձնաժողովի որոշումը ճիշտ գնահատեցին, ըստ որի՝ Արթուրը ենթակա է զինվորական ծառայության:
«Դուք որևէ փաստաթուղթ չեք ներկայացնում, որ մենք թերահավատ լինենք այս փաստաթղթի նկատմամբ: Կասկածի տակ դնելու որևէ հիմք և առիթ չունենք»,- հավելեց Գեղամ Հարությունյանը:
«Ես ինքս մայր եմ, ես արգելելու եմ երեխաս գնա ծառայության: Ամսի 12 թե 22, իմ երեխան չի գնալու ծառայության: Ինչ խումբ ուզում է լինի, ով մտնի մեր տուն, գլուխը ջարդելու եմ: Թող իմ երեխան հանցագործ դառնա … Էնտեղ զինվորը զինվորին կրակում է ընդամենը պրիշչիկի համար, որ ասեն՝ վիզը ծուռ ա… Ես իմ երեխային չեմ թողնելու, և վերջ»,- ասաց մայրը վրդովված:
«Առաջին լրատվական»-ի հետ զրույցում տիկին Օվսաննան իր դժգոհությունը հայտնեց հանձաժողովի աշխատանքից: «Իմ երեխան երեկոյան կուրացած է, գլուխը թեքում, կրկանի է պատկերները տեսնում, այսօր իմ երեխային ուղարկում են բանակ: Իմ երեխան գլուխը թեքի, ընկերոջը կրակի, ո՞ր բժիշկն է պատասխան տալու: Բժշիկը ինձ պրովոկացիոն հարց է տալիու. ունե՞ք փաստաղթուղթ: Ես ասում եմ՝ մի՞թե իմ որդին կենդանի փաստաթուղթ չէ:
Իմ մյուս որդին ծառայում է, այս մեկը պետք է բուժվի: Զինկոմը ինձ ասում է՝ որդուդ զենք չենք տա: Ավե՞լ ես տալու, այդ ավելը տար, տուր որևէ պատգամավորի լակոտի ձեռը, թող իմ երեխան բերդի պատերում լինի, միևնույն է, բանակ չեմ ուղարկելու»,- ասաց նա: