Վրաստանում ՀՀ դեսպանի մեկ անուն է շրջանառվում: «Առաջին լրատվական»-ի հետ զրույցում այս մասին ասաց Վրաստանի նախկին նախագահ Միխեիլ Սաակաշվիլիի հայազգի խորհրդական Վան Բայբուրդը: Նա նշեց, որ Վրաստանում Հայաստանի արտակարգ և լիազոր դեսպանի մեկ թեկնածուի անուն է շրջանառվում, և խոսք օլիմպիական չեմպիոն Յուրի Վարդանյանի մասին է: Եթե ի վերջո նա նշանակվի դեսպան, ապա, ըստ Բայբուրդի, դրական կլինի, քանի որ նա կկարողանա օգտագործել այդ պաշտոնում շուրջ 20 և ավելի տարիներ ԱՄՆ-ում կուտակած իր փորձն ու կապերը, արևմտյան արժեքային համակարգը: «Ես կարծում եմ, բացի դրանից՝ նա ունի նաև հեղինակավոր կապեր Վրաստանում, եթե նշանակվի, ապա դա իրեն կօգնի»,- ասաց նա: Վան Բայբուրդը նշեց, որ Հայաստանում լավ ավանդույթ է ձևավորվել Վրաստանում բանիմաց դեսպանի նշանակումը, չնայած այդ ավանդույթը մեկ անգամ խախտվել է, որը չխոչընդոտեց Հայաստան-Վրաստան հարաբերությունների առաջընթացին:
«Ես ինքս ականատես եմ եղել հենց առաջին դեսպանի՝ Լևոն Խաչատրյանի աշխատանքին, որը ոչ կարիերային դիվանագետ էր, բայց նորանկախ Հայաստանի առաջին դիվանագետն էր նորանկախ Վրաստանում: Նա լավ գիտեր՝ ինչ է Վրաստանը: Երկրորդ դեսպանը Գեորգի Խոսրոևն էր, որը նույնպես համարվում էր թբիլիսեցի: Թբիլիսիի հետ կապ չուներ Հրաչյա Սիլվանյանը, բայց նա շատ մեծ տպավորություն թողեց Վրաստանում իր գործունեությամբ և առաջին հայ դիվանագետն էր, որն արժանացավ քաղաքացիական ամենաբարձր վրացական շքանշանին: Վերջին դեսպանը Հովհաննես Մանուկյանն էր, ում վրացահայերս անվանում էինք մերը, որովհետև նրա մայրը թիֆլիսեցի էր, ինքն էլ շատ բարյացկամ վերաբերմունք ուներ Վրաստանի հանդեպ: Պետք է ասեմ, որ Մանուկյանի նշանակումն էլ Վրաստանում լավ ընդունվեց, որովհետև նա կարիերային դիվանագետ չէր, այն անձնավորություններից էր, որին կարող էիր վստահել ոլորտ՝ որպես մենեջերի, ու նույնը կարելի է ասել Յուրի Վարդանյանի մասին, եթե նա նշանակվի»,- ասաց Բայբուրդը՝ հավելելով, որ լավ ավանդույթ է ձևավորվում, որ դեսպանները, որոնք նշանակվում են Վրաստանում, պաշտոնյա են առնվազն կամ այդ դեսպանությունից հետո ավելի բարձր պաշտոնի են անցնում: