Թուրքական İhlas լրատվական գործակալության փոխանցմամբ՝ Թուրքիայի կառավարությունը խորհրդարանի հաստատմանն է ներկայացրել դատարանում քրդերեն լեզվով պաշտպանելու իրավունք տվող օրինագիծը:
Սա սեպտեմբերի 12-ից թուրքական բանտերում հարյուրավոր քրդերի կազմակերպած հացադուլի հիմնական պահանջներից մեկն է: Օրինագծով նախատեսվում է մեղադրյալին հնարավորություն տալ դատարանում, թուրքերենից բացի, այլ լեզվով պաշտպանել իրեն, եթե նա այդ լեզվին ավելի լավ է տիրապետում:
Հիշեցնենք, որ ավելի վաղ թուրքական բանտերում արգելված էր նաև քրդերենով հաղորդակցվելը, ինչը, սակայն, վերացվեց ներկայիս վարչապետ Ռեջեփ Էրդողանի գլխավորած «Արդարություն և զարգացում» կուսակցության (ԱԶԿ) կառավարման ժամանակաշրջանում:
