Պետդումայի միջազգային հարցերով հանձնաժողովի ղեկավար Ալեքսեյ Պուշկովը հայտարարել է, որ ռուսական պատվիրակությունը չի մասնակցի Եվրոպայի խորհրդի խորհրդարանական վեհաժողովի հունիսյան նստաշրջանին: Այս մասին նա ասել է «Իզվեստիա»-ին տված հարցազրույցում:
«Մենք ժամանակավորապես դադարեցրել ենք վեհաժողովի հետ համագործակցությունը՝ այնքան ժամանակ, քանի դեռ մեր պատվիրակության նկատմամբ պատժամիջոցներ են գործում»,- ասել է նա: Նրա խոսքով՝ այս մասին մայիսի 26-ին իրազեկվել է ԵԽԽՎ Նախագահական կոմիտեի անդամ Թինի Քոքսը, երբ նա մեկնել է Մոսկվա և հանդիպել Պետդումայի նախագահ Սերգեյ Նարիշկինի հետ:
Պուշկովը հավելել է, որ այդ մասին ասվել է նաև նամակում, որը Նարիշկինը մի քանի օր առաջ ուղարկել էր ԵԽԽՎ նախագահ Աննա Բրասերին: «Ուղերձում պարունակվում է Ղրիմի և ուկրաինական ճգնաժամի հարցում Ռուսաստանի դիրքորոշման մանրամասն հիմնավորումը, քննադատվում ռուսական պատվիրակությանը մի շարք լիազորություններից զրկելու ԵԽԽՎ որոշումը և խոսվում է այն մասին, որ մենք չենք հրաժարվում երկխոսությունից, բայց մերժում ենք պատժամիջոցների լեզուն, քանի որ դրանք համագործակցությունը դարձնում են անհնար»,- նշել է Պուշկովը:
Նա հավելել է, որ Պետդումայի նախագահը պատրաստակամություն է հայտնել այցելելու Ստրասբուրգ և ելույթ ունենալու այնտեղ ոչ միայն ռուսական պատվիրակության լիազորությունների վերականգնումից հետո:
Ավելի վաղ ԵԽԽՎ-ն ռուսական պատվիրակությանը զրկել էր մինչև տարեվերջ քվեարկություններին մասնակցելու իրավունքից, նաև սահմանել էր մի շարք պատժամիջոցներ:
