Պաղեստինի Ինքնավարության նախագահ, ՖԱԹՀ շարժման առաջնորդ Մահմուդ Աբասը ընդունել է նոր՝ ազգային համաձայնության կառավարության երդմնակալությունը, հաղորդում է Reuters-ը:
Գործակալությունը պարզաբանում է, որ նոր կառավարության նախարարները չեն պատկանում որևէ կուսակցության և հավանության են արժանացել ՀԱՄԱՍ-ի կողմից:
Երդմնակալության արարողությունը տեղի է ունեցել Ռամալլահ քաղաքում՝ Պաղեստինի առաջնորդի «Մուկատա» նստավայրում:
Նոր կառավարությունը գլխավորել է Արևմտյան ափում պաղեստինյան կառավարության ղեկավար Ռամի Համդալլահը: Աբասը դեռ մայիսի 29-ին պաշտոնապես նրան հանձնարարել էր ձևավորել ազգային միասնության կառավարությունը:
Հիշեցնենք, ապրիլի 23-ին ՖԱԹՀ-ն ու ՀԱՄԱՍ-ը Գազայում ստորագրեցին համաձայնագիր՝ ազգային միասնության կառավարություն ստեղծելու մասին: Դրանից հետո կողմերն ակտիվ բանակցություններ էին վարում կաբինետի ձևավորման շուրջ:
Ազգային միասնության կառավարության ձևավորմամբ, ենթադրվում է, որ վերջ կդրվի 7 տարի շարունակվող ներքաղաքական թշնամանքին, ինչը ճանապարհ կհարթի նախագահական և խորհրդարանական ընտրությունների համար:
