Ասոցացման համաձայնագրի նախագծում Ղարաբաղի հարցը չի արծարծվել: Այս մասին այսօր մի քանի լրատվամիջոցների հետ զրույցում ասաց Հայաստանում Լեհաստանի արտակարգ և լիազոր դեսպան Զդիսլավ Ռաչինսկին՝ անդրադառնալով Աստանայում Ռուսաստանի, Բելառուսի և Ղազախստանի միջև Եվրասիական տնտեսական միության ձևավորման մասին փաստաթղթի ստորագրմանն ու Հայաստանին առաջադրված պայմաններին:
Նա նշեց, որ շատ բան չի կարող մեկնաբանել, քանի որ իր տեղեկություններն այնքան են, որքան բոլորինը՝ սահմանափակվում են բաց տեղեկատվությամբ, որը ստանում են բոլորը: «Ինչ կտա այդ միությունը հարցին Հայաստանում պետք է պատասխանեն ՀՀ կառավարության տնտեսական հարցերով զբաղվող ներկայացուցիչները»,- ասաց նա:
Անդրադառնալով «Առաջին լրատվական»-ի դիտարկմանը, թե Նազարբաևը Հայաստանի առաջ պայման է դնում եվրասիական ինտեգրացիոն նախագծերին միանալ միջազգայնորեն ճանաչված սահմաններով, և խոսակցություններ կան, որ ԵՄ-ն ևս նման խնդիր էր դնելու՝ ասաց, որ Հայաստան-ԵՄ Ասոցացման համաձայնագրի նախագծում ԼՂ հարցը չի արծարծվել՝ բացի այն ձևակերպումներից, որոնց մասին նախկինում է խոսվել Մինսկի խմբի եռանախագահության մասին: «Սակայն ինձ հայտնի չեն Եվրասիական միության փաստաթղթերը, ուստի դժվարանում եմ խոսել: Եթե չեմ սխալվում, Հայաստանի և Ղարաբաղի մտածողության մեջ Ղարաբաղը հանդես է գալիս որպես անկախ, առանձին պետություն: Նախագահ Սարգսյանը պարզ և հստակ այդ մասին արտահայտվել է. Հայաստանը Հայաստանն է, Ղարաբաղը՝ Ղարաբաղը»,- ասաց նա:
Դեսպանը հրաժարվեց խոսել ՀՀ-ԵՄ հարաբերությունների մասին, քանի որ, ըստ նրա, նորություն գուցե լինի 2-3 ամսվա ընթացքում:
Լուսանկարը՝ Armenpress-ի
