ԱԺ ԲՀԿ խմբակցության պատգամավոր Միքայել Մելքումյանը հունիսի 2-ին խորհրդարանում 2013-ի բյուջեի կատարողականի հաշվետվության քննարկման ժամանակ դիմեց խորհրդարան ներկայացած Էներգետիկայի և բնական պաշարների փոխնախարար Արա Սիմոնյանին՝ բնակչությանը հուզող հարց տալով նրան: «Ես միտումնավոր հարցը պարոն Նազարյանին չուղղեցի, ըստ էության՝ խոսակցություններ կան, որ Էլեկտրաէներգիայի սակագինը նախատեսվում է 45 դրամի հասցնել: Եթե նման կանխատեսումներ կան, ի՞նչ կարող եք ասել»,- ասաց նա:
Սիմոնյանը պատասխանեց, թե կգերադասեր, որ այդ հարցը նաև Ռոբերտ Նազարյանին տային, բայց իմիջիայլոց նշեց, որ սակագների խնդիրն այդպես սառած խնդիր չի, ժամանակ առ ժամանակ կատարվում են վերանայումներ, նաև՝ էներգետիկ շուկայի մասնակիցների սակագների վերանայման հետ կապված:
«Չեմ թաքցնի՝ այս պահին էներգետիկ համակարգում ստեղծված են ֆինանսական որոշակի դժվարություններ, դրանք պայմանավորված են երկու հիմնական հանգամանքներով: Վերջին տարիներին, հիմա էլ շարունակվում է, սակավաջուր տարիներ էին, նվազել է հիդրոկայանների արտադրանքը, դրա բացը մենք ստիպված ենք լրացնել ջէկ-երի՝ ավելի թանկ արտադրանքով: Քննարկումներն ընթանում են, ու եթե շուկայի որոշակի մասնակիցների սակագների վերանայման կարիք լինի, ապա դա պետք է անենք»,- ասաց նա:
