ԱՄՆ նախագահ Բարաք Օբամայի այցը եվրոպական երկրներ, որի ժամանակ արևմտյան, ռուս և ուկրաինացի նախագահները կհանդիպեն Նորմանդիայում դաշնակիցների վայրէջքի 70-ամյակի առիթով տոնակատարությունների շրջանակում, կարող է նպաստել ուկրաինական ճգնաժամի կարգավորմանը՝ գրում է The Financial Times-ը:
Օբաման այսօր քառօրյա ուղևորություն է սկսել Եվրոպայում, կայցելի Լեհաստան, Բելգիա և Ֆրանսիա: Հինգշաբթի Օբաման տետատետ կընթրի Ելիսեյան պալատում Ֆրանսիայի նախագահ Ֆրանսուա Օլանդի հետ: Նույն օրը Վլադիմիր Պուտինը նույնպես կհանդիպի ֆրանսիացի առաջնորդի հետ «ոչ պաշտոնական» ընթրիքին: Ռուս և ամերիկացի առաջնորդները կարող են նաև այցելել Նորմանդիայում անցկացվելիք միջոցառումներին: Սպասվում է, որ Ֆրանսիա կայցելի նաև Ուկրիանայի նախագահ Պյոտր Պորոշենկոն:
«Վլադիմիր Պուտինի առաջին հանդիպումները Բարաք Օբամայի և եվրոպացի առաջնորդների հետ Ղրիմը Ռուսաստանին բռնակցելուց հետո կարող է լի լինել անհարմար դիվանագիտական պահերով… Այնուհանդերձ, և´ Ռուսաստանը, և´ Արևմուտքը մոտեցել են ուկրաինական ճգնաժամում շատ կարևոր պահի՝ բոլոր կողմերի հետաքրքրվածությունը՝ ձեռք բերելու ոչ հեշտ, սակայն անհրաժեշտ համաձայնագիր հետագա քայլերի մասին»,- գրում է The Financial Times-ը:
Օբաման կայցելի նաև Լեհաստան, որտեղ կհանդիպի Պորոշենկոյի հետ, և Բրյուսել, որտեղ կանցկացվի G7-ի գագաթնաժողովը: Այնտեղ նա կարող է իր եվրոպացի դաշնակիցների հետ քննարկել Ռուսաստանի վրա տնտեսական ճնշման շարունակությունը՝ նշում է պարբերականը:
Արևմուտքը մինչև Ուկրաինայի ընտրությունները հայտարարել էր, որ կխստացնի տնտեսական պատժամիջոցները, եթե Ռուսաստանը խոչընդոտի քվեարկության անցկացմանը: Ընտրություններն անցան համեմատաբար հանգիստ, սակայն ԵՄ-ն ու ԱՄՆ-ը մտադիր չեն հրաժարվել Ռուսատանի վրա ազդելու հետագա լծակների որոնումից:
Եվրոպական իշխանությունները տարակարծիք են Ուկրաինայի արևելքում տեղի ունեցածի վերաբերյալ: ԱՄՆ-ը կարծում է, որ բողոքի ցույցերը հրահրում է Մոսկվան, իսկ որոշ եվրոպացի առաջնորդներ կարծում են, որ դրանք բացառապես տեղային բնույթ են կրում:
Չնայած Օբամայի վարչակազմը ողջ ուժով ձգտում է ցույց տալ, որ Արևմուտքը չի պատրաստում նախկինի պես փոխգործակցել Ռուսաստանի հետ, ամերիկյան իշխանությունները խոստովանում են, որ Ուկրաինայում անհրաժեշտ միջոցառումներից մեկը իշխանության ապակենտրոնացումն է: Նման քայլը վերջին հաշվով կնպաստի նրան, որ Ռուսաստանն ու Արևմուտքը ուկրաինական հարցում կգան որոշակի համաձայնության՝ կարծում է պարբերականը:
