Աստանայում տեղի ունեցածից հետո Հայաստանն իսկապես լուրջ իրավիճակում է հայտնվել, ու պիտի կարողանա ճիշտ քայլեր ձեռնարկել, ընդհուպ մինչև իր պայմանները թելադրել, բայց թե ինչի կհանգենք, սա ժամանակի հարց է: Լրագրողների հետ ճեպազրույցում նման տեսակետ հայտնեց ԱԺ «Ժառանգություն» խմբակցության ղեկավար Ռուբիկ Հակոբյանը: Նա նշեց, որ Ղազախստանը ցանկանում է հավաստիանալ՝ Ղարաբաղը մաս չի կազմելու որևէ կառույցի, որտեղ լինելու է Հայաստանը, և դա ցանկանում է արձանագրել փաստաթղթով:
«Մենք ասում ենք՝ որտեղ մենք, այնտեղ՝ Արցախը, և այդպես ասում ենք մեզ բավարարելու համար, սակայն միջազգային հարթության վրա անհասկանալի է, որ կարելի է ինչ-որ տեղ այս տրամադրությամբ նման կառույցի մաս կազմել: Հայաստանը պետք է իր հստակ դիրքորոշումն արտահայտի, և եթե Արցախն անտեսվում է այս կառույցում, Հայաստանն էլ պետք է իմանա իր անելիքները»,- ասաց նա:
Հակոբյանը նշում է, որ Հայաստանը երեկվա զարգացումներին պետք է պատարստ լիներ, ակտիվ քաղաքականություն պիտի տաներ, մանավանդ՝ հստակ է՝ այս պետությունների համար առաջնահերթությունը որն է, իսկ Ղազախստանն էլ չի թաքցնում, որ ներկայացնելու է Ադրբեջանի պետական շահը: