Բրիտանական կառավարությունը համաձայնել է հրապարակել ԱՄՆ նախագահ Ջորջ Բուշ կրտսերի և Մեծ Բրիտանիայի վարչապետ Թոնի Բլերի բանակցությունների մանրամասները, որտեղ նրանք քննարկել են միջազգային կոալիցիայի զորքերի ներխուժումը Իրաք, սակայն ձայնագրությունները կհրապարակեն ոչ ամբողջությամբ և ոչ շուտ։ Այս մասին գրում է RIA Novosti–ն։
2003 թ. մարտին սկսված, սակայն Բրիտանիայի զինծառայողների համար 2009-ի ամռանն ավարտված իրաքյան արշավին բրիտանական մասնակցության հրապարակային հետաքննությամբ զբաղվում է սըր Ջոն Չիլքոթի ղեկավարած հանձնաժողովը, որն աշխատում է 2009 թ. հունիսից։ 2010 թ. հուլիսին նա ավարտել է վկաների հարցաքննությունը, որոնց թվում եղել են նախկին վարչապետներ Թոնի Բլերն ու Գորդոն Բրաունը, բրիտանացի քաղաքական գործիչներ, զինվորականներ ու դիվանագետներ, և ձեռնամուխ է եղել փաստաթղթերի վերլուծությանը։
«Ներկայումս սկսվել է վարչապետի և նախագահի զրույցների շարադրանքն ու մեջբերումները հանձնելու որոշման քննարկումը։ Պարզ չէ, թե որքան ժամանակ այն կզբաղեցնի, սակայն կառավարությունը մտադիր է անել ամեն ինչ, որպեսզի այդ գործընթացն ավարտվի հնարավորինս արագ»,- ասվում է բրիտանական վարչապետի խորհրդական Ջերեմի Հեյվուդի՝ Չիլքոթին հղված նամակում։
