ԱԺ պատգամավոր Ալեքսանդր Արզումանյանը մայիսի 29-ին խորհրդարանում 2013-ի բյուջեի կատարողականի հաշվետվության քննարկման ժամանակ իր զարմանքը հայտնեց այն առթիվ, որ արտգործնախարարության հաշվետվության զեկուցումը հանձնարարվել է նորանշանակ փոխնախարարին՝ Կարեն Նազարյանին: Դիմելով նրան, Արզումանյանը նշեց, որ որևէ կասկած չունի նրա դիվանագիտական հմտությունների վերաբերյալ, ուղղակի մտահոգություն ունի, որովհետև պարզ է, որ շատ հաճախ նախարարը չի կարողանում անձամբ ներկա լինել և հիմնականում տեղակալին է հանձնարարում:
«Այս պարագայում Դուք եկել եք մեզ հաշվետվություն տալու անցյալ տարվա կատարած աշխատանքների մասին, որոնց ողջ ընթացքում Դուք եղել եք ՄԱԿ-ում մեր դեսպանը, այսինքն՝ Դուք նույնիսկ Եվրամիության կամ մյուսի հետ կապ չեք ունեցել, այսինքն՝ այստեղ խնդիրներ կան, որոնք մենք կուզենանք այլ մարդուց լսել հաշվետվություն: Այսինքն՝ Դուք հիմա հաշվետվություն եք տալիս մի բանի մասին, որից տեղյակ չեք, ինչպես պարոն Էնֆիաջյանը չի կարող գյուղնախարարության փոխարեն հաշվետվություն տալ»,- ասաց նա՝ հավելելով, որ հաշվետվություն տալ կկարողանար, եթե որոշ ժամանակ անցներ ու ծանոթանար:
Կարեն Նազարյանը նշեց, որ փորձել է շատ կարճ ժամանակահատվածում սերտել այն խնդիրները, որ գոյություն ունեն Հայաստան – ԵՄ բնագավառում, բայց խոստացավ, որ շուտով առիթ կունենան ավելի խորքային, բովանդակային քննարկումներ իրականացնել: «Միայն դրա համար ինձ պետք է մի փոքր ժամանակ»,- ասաց նա:
ԲՀԿ խմբակցության քարտուղար Նաիրա Զոհրաբյանը տեղից արձագանքեց. «Պարոն Արզումանյան, վատ մի զգացեք, պարոն Նալբանդյանն էլ երեկ դեռ չգիտեր՝ Աստանայում ինչ է սպասվում Հայաստանին: Եթե հիշում եք, ասեց՝ կգնանք Աստանա, կերևա, բայց՝ այո, մենք էստեղ խորհրդարանականներս իրավունք ունենք իմանալու»: Զոհրաբյանը նշեց՝ եթե ասում ենք, որ Հայաստան – ԵՄ ասոցացման պայմանագրի քաղաքական հատվածում մեզ համար անընդունելի դրույթ կար՝ մաքսակետ Հայաստանի և ԼՂ միջև, ապա այսօրվա որոշակի հայտարարությունները՝ կապված ԼՂ հետ, կապված ՄԱԿ-ի ճանաչված սահմանների հետ լրջագույն խնդիրներ են առաջացնում: «Ո՞վ է դրանց պատասխանը տալու, ո՞վ է գալու խորհրդարանին և ի դեմս խորհրդարանի՝ նաև ժողովրդին բացատրելու, թե ի վերջո, ԼՂ-ն Հայաստանի հետ միասին լինելու՞ է նոր ինտեգրացիոն տնտեսական տարածքի անդամ, թե ոչ»:
