Վենեսուելայի իշխանությունները քաղաքական ընդդիմությանը մեղադրել են երկրի նախագահ Նիկոլաս Մադուրոյին սպանելու մտադրությունների մեջ: ITAR-TASS-ի փոխանցմամբ՝ այս մասին հայտարարվել է մամլո ասուլիսի ժամանակ, որն անցկացվել է իշխող Միացյալ սոցիալիստական կուսակցության մի քանի ղեկավարների կողմից:
Կարակասի քաղաքապետ Խորխե Ռոդրիգեսը հատվածներ է կարդացել նախկին պատգամավոր Մարիա Կորինա Մաչադոյի էլեկտրոնային նամակից, որում ասվում է Մադուրոյին ոչնչացնելու համար ֆինանսավորում գտնելու անհրաժեշտության մասին: Նամակը հասցեագրված էր այլ ընդդիմադիր Դիեգո Արիային: Բացի այդ, ներկայացվել են այլ հատվածներ Մաչադոյի մեկ այլ էլեկտրոնային նամակից, որում նա գրել է այն մասին, որ բողոքի ակցիաները Վենեսուելայում ֆինանսավորում են տեղի բանկիրները:
Ռոդրիգեսը նաև մեղադրել է Մաչադոյին Կոլումբիայում ԱՄՆ դեսպան Քևին Ուիթաքերի հետ կապերի մեջ, որի հետ նա մշակել է երկրում իրավիճակի ապակայունացման ծրագրեր:
Քաղաքապետի խոսքով՝ իշխանությունների տրամադրության տակ կա տեսագրություն, որն արվել է ուսումնամարզական ճամբարում, որտեղ նախապատրաստվել են Մադուրոյին սպանել պատրաստվող գրոհայինները: Բռնության բարձր մակարդակ պարունակող տեսանյութը որոշվել է չցուցադրել հեռուստատեսությամբ:
Մաչադոն և Արիան հավաստում են, որ իրենց դեմ առաջադրված մեղադրանքները շինծու են:
