«Որդիս չէր կարող ինքնասպան լինել, բացառվում է, որդուս սպանել են»,- այսօր կառավարության մոտ որդու նկարներով եկել էր Թալինի շրջանի Ցամաքասար գյուղի բնակիչ Հովսեփ Մուրադյանը: Նա պնդում է, որ որդուն՝ Արման Մուրադյանին, մեկ տարի առաջ՝ հուլիսի 30-ին, Մարտակերտի զորամասերից մեկում դաժան ծեծել են, ապա հրազենով սպանել:
Ըստ պաշտոնական վարկածի՝ Արման Մուրադյանը ինքնասպանություն է գործել, մինչդեռ հոր պնդմամբ՝ որդու մարմնի վրա բազմաթիվ հետքեր են եղել:
«Նախաքննական մարմինը կեղծ և հանցավոր քննություն է իրականացրել, և գործը տասը ամիս հետո այժմ գտնվում է Սյունիքի մարզի առաջին ատյանի դատարանում, նստավայրը՝ Ստեփանակերտ: Ես նոր եմ իմացել, որ Ստեփանակերտը Սյունիքում է: Իմ գրավոր միջնորդությանը՝ գործը տեղափոխել Սյունիքի մարզի Սիսիան և Գորիս քաղաքներ, դատարանը բանավոր պատասխանել է՝ ոչ»,- ասաց որդեկորույս հայրը:
Նա պատմեց, որ որդու հետ մինչև դեպքը խոսել է անընդհատ, գոհ է եղել, օրը երեք անգամ և՛ ինքը, և՛ կինը, և՛ փոքր որդին զրուցել են:
«Դեպքից ուղիղ մեկ տարի առաջ կոնֆլիկտ է եղել: Պատճառը՝ երբ ուսումնական զորամասից՝ Լուսակերտից, տեղափոխում են Մարտակերտ, մեկ ամիս հետո գնում է արձակուրդ, արձակուրդից վերադառնալիս հետը վերցնում է ժամացույց, բջջային հեռախոս, և, գիտեք, զինվոր է, ինչ դրած կլինեն տնից: Գնալով զորամաս՝ ավելի երկար ծառայած զինվորները հարցրել են, թե ինչքան գումար ես տվել, որ ընկել ես այս գումարտակ, ապա ծեծել են որդուս՝ գումարտակի հրամանատար Հովիկ Սաղաթելյանի ներկայությամբ: Որդիս ինքնապաշտպանության դիմելու համար ձեռքն է վնասել, ընկել հոսպիտալ, իսկ նախաքննական մարմինը այդ ժամանակ սպառնացել է որդուս՝ եթե ցուցմունք տաս զինվորների դեմ, զորամասից վերադառնալուց քեզ հետ լավ բան չի լինի: Բուժվելուց հետո երեք ամիս անց որդիս վերադարձել է զորամաս, ևս վեց ամիս շարունակել ծառայել, օրական երկու-երեք անգամ հեռախոսազանգ ենք ունեցել: Որդուս տեղափոխելիս շորերը փոշոտ են եղել, ականջի մեջ՝ հող լցրած: Ծեծել են, ապա հրազենով կրակել:
Հիմա գործ է հարուցվել Էմիլ Ավետիսյանի նկատմամբ, որը գումարտակի հրամանատարի տեղակալն է, որ, իբր, դրդել է ինքնասպանության, բայց ես կարող եմ ասել՝ հենց ինքն է սպանել, դա հաստատ է»,- ասաց հայրը:
Դեպքից տասը օր առաջ Հովսեփ Մուրադյանը գնացել է որդու մոտ, որդին հոգոց է հանել, ասել, որ կոնֆլիկտ կա ինչ-որ անձնավորության հետ, բայց հորը ասել է՝ պետք չէ միջամտել, ինքը կհարթի հարցը:
