Գալիք նախագահական ընտրություններում գործող նախագահ Սերժ Սարգսյանը և ԲՀԿ ղեկավար Գագիկ Ծառուկյանը առաջատարներն են: «Ժառանգություն» կուսակցության ղեկավար Րաֆֆի Հովհաննիսյանը, ՀԱԿ առաջնորդ Լևոն Տեր-Պետրոսյանը և ՀՀ երկրորդ նախագահ Ռոբերտ Քոչարյանն այս պահին իրար հավասար տեղում են: Նրանցից հետո դաշնակցական թեկնածուներն են՝ Վահան Հովհաննիսյանը, Արմեն Ռուստամյանը: Այսօր լրագրողների հետ հանդիպման ժամանակ այս մասին ասաց «Սոցիոմետր» սոցիոլոգիական կենտրոնի ղեկավար, սոցիոլոգ Ահարոն Ադիբեկյանը՝ խոսելով գալիք նախագահական ընտրություններին նախագահի թեկնածուների վարկանիշների շուրջ:
Համեմատականներ տանելով ԱՄՆ ընտրությունների հետ՝ սոցիոլոգը նկատեց, որ ԱՄՆ նախագահի թեկնածու Բարաք Օբաման Կոլումբիայի Դաշնային շրջանում 92% ձայն է հավաքել: Նա բացատրեց, որ Վաշինգտոնը Կոլումբիայի կենտրոնն է, Վաշինգտոնի բնակիչների երկու երրորդը սևամորթներ են, ուստի սևամորթները քվեարկել են Բարաք Օբամայի օգտին: Բանախոսի համոզմամբ՝ հաղթանակը ԱՄՆ նախագահական ընտրություններում կապ չի ունեցել գաղափարի և վարչական ռեսուրսի հետ, սևամորթների մեծ մասը պարզապես իր ձայնը տվել է Օբամային:
«Նա հիմնականում ստացել է կանանց և երիտասարդների ձայնը, որոնք գաղափարապես այնքան էլ հասուն չեն, իսկ պահպանողականները՝ մեծահասակները, ձայնը տվել են Ռոմնիին: Երբ համեմատում ենք բավականին դիպուկ է Հայաստանի հետ: Հայաստանում Օբամայի տեղը զբաղեցնում է Գագիկ Ծառուկյանը, ով խոսում է հասարակ ժողովրդի կարիքներից, երբևէ լսել եք, որ Գագիկ Ծառուկյանն արտաքին քաղաքականությունից խոսի»,- նշեց Ահարոն Ադիբեկյանը՝ շարունակելով, որ այսօրվա հայաստանյան քաղաքական դատում ԲՀԿ-ն շարունակում է զբաղեցնել ջոկերի տեղը և իր շուրջ ինտրիգ պահպանել՝ ԲՀԿ-ն կարող է և վերադառնալ իշխանական կոալիցիա, և սեփական թեկնածու առաջադրել, և սատարել այլ կուսակցության թեկնածուի:
Խոսելով առաջին տարբերակի հավանականությունից՝ Ադիբեկյանն ասաց, որ Հովիկ Աբրահամյանի միջոցով կարող է լինել քաղաքական առևտուր, քանի որ Հովիկ Աբրահամյանը կապեր ունի և Սերժ Սարգսյանի, և Գագիկ Ծառուկյանի հետ: Ըստ նրա՝ նման առևտուրն ընդունված է ամբողջ աշխարհում: «Նստած-հելած տղերքը բավական հաջող նախագահ են դառնում»,- նկատեց Ահարոն Ադիբեկյանը՝ ակնարկելով Գագիկ Ծառուկյանին:
