Ազատության հայտնի արձանը, որն օրվա մութ ժամերին միշտ լուսավորված է, ԱՄՆ-ում մոլեգնած «Սենդի» փոթորկի հետևանքով գրեթե 2 շաբաթ մնացել էր մթության մեջ: Միայն ուրբաթ երեկոյան ԱՄՆ-ի Ազգային զբոսայգիների ծառայության աշխատակիցներին հաջողվեց արձանի թագն ու ջահը նորից լուսավորել` հայտնում է ИТАР-ТАСС-ը:
Ազատության արձանը Նյու Յորքի գլխավոր խորհրդանիշն է, այն վերականգնումից հետո պաշտոնապես բացվել էր հոկտեմբերի 28-ին: Սակայն այժմ արձանը կրկին փակ է անհայտ ժամկետով: Մասնագետները զբաղված են Լիբերթի Այլենդ կղզում փոթորկի հետևանքների վերացմամբ. այնտեղ է գտնվում արձանը: Փորձագետների գնահատմամբ` արձանը չի տուժել փոթորկից:
Ազատության արձանի բացման արարողությունը տեղի է ունեցել 1886-ի հոկտեմբերի 28-ին: Այն Ֆրանսիայի նվերն էր Ամերիկայի ժողովրդին` ամերիկյան հեղափոխության 100-ամյակի առթիվ: 1875-ին Ֆրեդերիկ Բարտոլդիի հեղինակած արձանն ունի 92 մ բարձրություն, կազմված է 350 մասերից, քաշը 225 տոննա է:
Նորոգման ընթացքում արձանի` թագին տանող սանդուղքը 354 աստիճանից դարձել է 393:
Հիշեցնենք. «Սենդին» ԱՄՆ-ի տարածքում խլել է ավելի քան 100 մարդու կյանք: Նյու Յորք և Նյու Ջերսի նահանգների հազարավոր բնակիչներ մնացել էին առանց էլեկտրականության:
