ԱՄՆ-ում ընկերության գլխավոր տնօրենի պաշտոնը զբաղեցնող անձանց միջին եկամուտը տարեկան հասել է ռեկորդային 10,5 միլիոն դոլարի: Ինչպես ցույց է տվել ուսումնասիրությունը, որի արդյունքները հրապարակել է Associated Press գործակալությունը, վերջին տարում այդ ցուցանիշը աճել է 8,8%-ով:
Ուսումնասիրության հեղինակները պնդում են, որ ԱՄՆ-ում գլխավոև տնօրենը ներկա պահին միջինը 257 անգամ ավելի շատ է վաստակում, քան սովորական աշխատողը: 2009թ. այդ ցուցանիշը 181 էր կազմում:
Ուսումնասիրության համաձայն՝ տարվա արդյունքներով ԱՄՆ-ի ամենաբարձր վարձատրվող թոփ-մենեջերը Nabors-ի ղեկավար Էնթոնի Փեթրելլոն է: 2013թ. նավթարդյունաբերության ոլորտում մասնագիտացված ընկերության ղեկավարը 68,3 միլիոն դոլար է վաստակել: Նրան հաջորդում է CBS հեռուստառադիոկորպորացիայի ղեկավար Լեսլի Մունվեսը, ով 2013թ. 65,6 միլիոն դոլար է վաստակել:
Վերջին տարում ամենից շատ ավելացել են բանկային ոլորտի ղեկավարության եկամուտները: Ընկերությունների գլխավոր տնօրենները 2013թ. միջինը 22%-ով ավելի շատ են վաստակել, քան 2012թ.: Ամենամեծ եկամուտը գրանցվել է Blackrock ֆինանսական ընկերության տնօրեն Լարի Ֆինքի մոտ՝ 22,9 միլիոն դոլար:
