Հնարավոր է` Հունաստանը դեֆոլտ հայտարարի արդեն եկող ուրբաթ օրը, երբ լրանում է երկրի 5 մլրդ եվրոյի պետական պարտատոմսերի մարման ժամկետը։ Դրանք գտնվում են Եվրոպական կենտրոնական բանկի հաշվեկշռում։
«Երկիրը փող չունի, պարտքի ժամկետը չի համաձայնել երկարաձգել»,– հայտնել է The Financial Times-ը` հղում անելով բարձրաստիճան եվրոպացի պաշտոնյային: Այսպիսով բանկը փորձում է ճնշում գործադրել վարկատուների եռյակի մյուս 2–ի՝ ԵՀ-ի և ԱՄՀ-ի վրա, որպեսզի նրանց ստիպի շուտ պայմանավորվել վարկի կրճատման պայմանների շուրջ:
Հիշեցնենք` նոյեմբերի 5-ին Հունաստանի կառավարությունը ԵՄ-ի և ԱՄՀ-ի նոր վարկերի փոխարեն ծախսերը 13,5 մլրդ եվրոյով կրճատելու օրինագիծ է ներկայացրել խորհրդարան: Օրինագիծը նախատեսում է աշխատավարձերի և կենսաթոշակների հետագա կրճատում, հարկերի բարձրացում: Նախատեսվում է 2013-ին ծախսերը կրճատել 9,2 մլրդ եվրոյով:
Երկրի վարկատուները հայտարարում են, որ առանց այդ միջոցառումները ձեռնարկելու Հունաստանը չի ստանա 31,5 մլրդ եվրո հերթական վարկը։
Երկուշաբթի օրը երկրի կառավարության խիստ տնտեսության քաղաքականության միջոցառումների դեմ բողոքի ակցիա էր սկսվել:
Աթենքին անհրաժեշտ է վարկատուների «եռյակի»` ԵՄ-ի, ԵԿԲ-ի և ԱՄՀ-ի հետ համաձայնեցնել 2013-2014-ը մինչև 13,5 մլրդ եվրո խնայելու ծրագիրը: Հնարավոր է` Հունաստանին հերթական վարկը հատկացվի նոյեմբերի 12-ին` պայմանով, որ երկիրը համաձայնի բոլոր անհրաժեշտ բարեփոխումներն իրականացնել:
