ԱԺ ՀԱԿ խմբակցության պատգամավոր Նիկոլ Փաշինյանը մայիսի 27-ին խորհրդարանում 2013-ի բյուջեի կատարողականի հաշվետվության քննարկման ժամանակ Սյունիքի մարզպետ Վահե Հակոբյանին դիմելով՝ հետաքրքրվեց՝ արդյոք նրան չի մտահոգում իր մարզում ստեղծված վիճակը: «Արդեն, կներեք, ավանդույթ է դառնում, ցավոք, տխուր ավանդույթ, որ մենք Սյունիքի մարզից և հատկապես՝ Գորիսից, լսում ենք սարսափազդու լուրեր: Տպավորություն է, որ Գորիսը հավակնում է կրիմինալ մայրաքաղաք դառնալուն: Էս վիճակը չի՞ մտահոգում ձեզ, ե՞րբ է էս ամեն ինչի վերջը տրվելու, մանավանդ որ էդ պրոցեսների համատեքստում հաճախ հնչում է Ձեր կուսակցական ղեկավարի անունը»,- ասաց նա՝ մանրամասնելով, որ խոսքը Սյունիքի նախկին մարզպետ Սուրիկ Խաչատրյանի մասին է, ով Սյունիքի ՀՀԿ մարզային խորհրդի նախագահն է: Փաշինյանը հետաքրքրվեց՝ Հակոբյանը, որպես մարզպետ, ինչ որ բան անու՞մ է այդ մթնոլորտից ձերբազատվելու համար: «Անընդհատ խոսում ենք իրավական երկրի, օրենքի գերակայության մասին, բայց ոնց որ Ձեր մարզում ահագին անպատժելի մարդիկ կան, հա՞»,- հարցրեց նա:
Հակոբյանը արձագանքեց, որ եթե պատգամավորը նկատի ունի վերջին օրերին տեղի ունեցած միջադեպը, իհարկե, «ծեծկռտուք է եղել և ինչ-որ դանակահարություն», քրեական տարրեր կան և բնականաբար, դա չի ողջունվում, սակայն մարզպետը կարծում է՝ իրավական գնահատական կլինի: «Վերջին տարում Գորիսի հայտնի դեպքերից հետո քաղաքը որոշակի լարվածության և ուշադրության կենտրոնում էր, մենք մի քիչ ավելի, էսպես ասած, գերուշադիր ենք էդ ռեգիոնի նկատմամբ, բայց կարծում եմ, որ էն երևույթները, որոնք քրեական էլեմենտներ են պարունակում իրենց մեջ, ամեն դեպքում դա անթույլատրելի է՝ կլինի իմ պարագայում, իմ եղբոր պարագայում, թե իմ հորեղբոր տղայի: Սա որևէ բանով ինձ չի ապահովում և չի արդարացնում»,- նշեց նա:
Փաշինյանն արձագանքեց, որ մարզպետի լավատեսությունը չի կիսում, կարծում է՝ իրավական գնահատական չի տվրի: «Ի՞նչ հիմք ունեմ ասելու, էդպիսի բազմաթիվ դեպքեր են եղել, որոնց իրավական համարժեք գնահատականը չի տրվել, էսօր, ի դեպ, մամուլում հրապարակումներ կային այն մասին, որ այս դեպքի մասնակիցները նրանք են, ովքեր շատ տարիներ առաջ դատապարտված են եղել սպանությունների գործով և, չգիտես ինչպես, հայտնվել են անազատության մեջ»,- ասաց նա: Փաշինյանը մարզպետի ուշադրությունը հրավիրեց փաստի վրա և իր տարակուսանքն արտահայտեց այն կապակցությամբ, որ խոսքը ՀՀԿ Սյունիքի մարզային կառույցի ղեկավարի ընտանիքի մասին է:
«Ես չեմ կարծում, որ պարոն Խաչատրյանը խրախուսում է դա, ողջունում է: Ինքն էլ նաև երևի մտահոգ ա: Ամեն դեպքում, քննությունը կընթանա, ես համոզված եմ, որ ինչ-որ գնահատականներ իրավական դաշտում կլինեն»,- ասաց նա:
