«Կառավարության ծրագրը ԱԺ մեծամասնությունը համարեց իրատեսական. այն տնտեսական ցուցանիշները, որ ծրագրում նշվում են, կարելի է համարել, որ նորմալ աշխատանքային պայմաններում իրագործելի են, և մենք ամեն ինչ անելու ենք այդ ծրագիրն իրականցնելու համար»,- այսօր լրագրողների հետ հանդիպման ընթացքում այս մասին ասաց ՀՀԿ խմբակցության քարտուղար Գագիկ Մելիքյանը:
Անդրադառնալով նախորդ կառավարության գործունեությանը՝ Մելիքյանն ասաց, որ հիմնական դժգոհությունը գալիս էր այն հանգամանքից, որ այդ կառավարությունը համաշխարհային ֆինանսատնտեսական ճգնաժամը չէր հաղթահարել: «Դրա հետևանքները մինչև հիմա զգալի են այնպիսի գերհզոր երկրների համար, ինչպիսիք են Ամերիկան, Ռուսաստանը, Ճապոնիան: Դեռ երկար զգալու ենք դրա հետևանքները, կարծես միայն Չինաստանի վրա թույլ ազդեցություն ունեցավ:
Կառավարությունը հրաժարական տվեց, նոր կառավարություն ձևավորվեց, որը նախորդ կառավարության ձեռքբերումների հիման վրա շարունակելու է, բայց երկու կառավարությունների ձևավորման համար պատասխանատու է Հանրապետական կուսակցությունը»,- ասաց նա:
ՀՀԿ նորանշանակ քարտուղարն ասաց նաև, որ իրենք այսուհետ վարելու են երկբևեռ քաղաքականություն.«Մի բևեռը լինելու է իշխանությունը, մյուսը՝ ընդդիմադիր ուժերը: Այսօր հանրապետությունում ընդդիմադիր և մյուս քաղաքական ուժերի հետ համագործակցությունը ցանկանում ենք հասցնել այն մակարդակին, որ մեզ չընդունեն որպես թշնամի: Մենք չենք խոչընդոտելու որևէ քաղաքական ուժի գործունեությանը,քաղաքական բոլոր ուժերն իրենք են որոշում իրենց տեղն ու դիրքը քաղաքական դաշտում, իրենց գործունեությամբ կամ անգործությամբ նրանք կարող են ինքնաոչնչացման կամ զարգացման գնալ»:
