ԱԺ ՕԵԿ խմբակցության պատգամավոր Հովհաննես Մարգարյանը մայիսի 26-ին խորհրդարանում 2013-ի բյուջեի կատարողականի հաշվետվության քննարկման ժամանակ դիմելով կառավարության աշխատակազմի ղեկավար-նախարար Դավիթ Հարությունյանին՝ հետաքրքրվեց՝ ի՞նչ կարծիք ունի «Գնումների մասին» օրենքի նախագծի վերաբերյալ, որ ԱԺ է բերվել կառավարության կողմից:
«Խոսքս մասնավորապես բարձրաստիճան պաշտոնյաների ծախսերի գաղտնիության մասին է. ծախսերի հետ կապված՝ պետք է իրազեկված լինենք, որ իմանանք՝ որ ուղղությամբ ինչ ծախսեր են կատարվել, որպեսզի իմանանք՝ արդյոք այդ ծախսերը կատարվե՞լ են, թե՞ ոչ: Ես կարևորում եմ ձեր տեսակետը: Մենք դեմ քվեարկեցինք, միաժամանակ առաջարկեցինք, որ դրանք մնան թափանցիկ և իրազեկվեն»,- ասաց նա:
Հարությունյանը համաձայնեց՝ հաշվետվողականության տեսանկյունից կարևոր է, որ ծախսերը հնարավորինս շատ թափանցիկ լինեն, ապա նշեց, որ բարձրացված հարցն այն դեպքն է, երբ պետք է լինեն օբյեկտիվ, և ծախսերի այն մասը, որը վտանգ կարող է ներկայացնել, չհրապարակվի:
«Բայց պետք է լինենք նաև ուշադիր, որ ավելի շատ բան չգաղտնիացնենք, որքան անհրաժեշտ է… Ամբողջովին համաձայն եմ… Ամենայն հավանականությամբ, բուն ծախսերը չպետք է լինեն գաղտնի, պետք է լինեն աղբյուրները, պետք է լինի գործընթացը: Մենք կաշխատենք այս ուղղությամբ մինչ երկրորդ ընթերցում»,- ասաց նա:
