Սյունիքի նախկին մարզպետ Սուրիկ Խաչատրյանի՝ Լիսկայի տոհմը կրկին աչքի է ընկել իր «հերոսությամբ»: Նրա եղբոր որդիները մարդ են ծեծել, դանակահարել ու առևանգել:
Սյունիքի, Գորիսի համար սա մի սովորական երևույթ է, որը արդեն ոչ մեկին չի զարմացնում: Սա մի սովորական երևույթ է նաև Հայաստանի հասարակության համար: Երբ մարդասպանությունից հետո ազատ են արձակվում և չեն մեղադրվում Լիսկայի որդին ու թիկնապահը, երբ բազմաթիվ մարդասպանություններից հետո նրա հարազատները, եղբոր որդիները, եղբայրը մնում են անպատիժ կամ պատիժը կրում են ձևական, ապա մարդ ծեծելն ու առևանգելը ընդամենը չարություն են՝ ինչպես կասեր Գալուստ Սահակյանը՝ Լիսկայի մեկ այլ փառապանծ կուսակիցը:
Անպատժելիությունը ծնում է նորանոր հանցանքներ. սա մի սովորական աքսիոմատիկ ճշմարտություն է, որն իմանալու համար մեծ խելք պետք չէ՝ ինչպես կասեր Լիսկայի մյուս կուսակիցը՝ Հովիկ Աբրահամյանը, որը ինչ-որ աննախադեպ փոփոխություններ է ավետում հասարակությանը: Մինչդեռ հասարակությունն ընդամենը մեկ փոփոխության կարիք ունի՝ պատժել բոլոր հանցագործներին ու օրինախախտներին: Որովհետև երբ մարդասպանները, մարդ ծեծողներն ու առևանգողները ոչ միայն ազատ պտտվում են Հայաստանում, այլև կարող են մամուլով ազատ հայտարարել, որ իրենք երբեք չեն պարտվում, մնացյալ ամեն ինչ դառնում է օդի տատանում՝ ինչպես կասեր արդեն Լիսկայի փառապանծ կուսակցապետ Սերժ Սարգսյանը: Նա երկու օր առաջ իր հերթական ելույթն էր ունենում փոփոխությունների ու լուսավոր ապագայի մասին՝ հայտարարելով, որ Մելիք-Ադամյան փողոցից մինչև Մեղրի ու Տաշիր իրենք են և իրենք են լինելու: Գորիսը Մելիք-Ադամյանից մինչև Մեղրի ճանապարհին է:
Եվ այստեղ տեղի ունեցած հերթական միջադեպը վառ կերպով ցույց է տալիս, թե ահա ինչ է նշանակում, երբ Մելիք-Ադամյանից մինչև Մեղրի ՀՀԿ-ն է ամենա-ամենան: Դա նշանակում է, որ Լիսկայի ու նրա նմանների անպատժելիությունը շարունակվելու է, շարունակվելու է Հայաստանի հասարակության հանդեպ պարբերական տեռորը, իսկ հետո նույն այդ տեռորիստները նստելու են Մարզահամերգային համալիրի դահլիճում ու լսելու են իրենց առաջնորդ Սերժ Սարգսյանի հերթական առաջադիմական ելույթը Հայաստանում փոփոխությունների դրոշակակիր ՀՀԿ-ի լուսավոր գոյության մասին:
Այդ ընթացքում նրանց թիկնապահները, որդիները, եղբոր որդիները, քրոջ որդիները, եղբայրները, քեռիները, հորեղբայրները և մյուսները շարունակելու են իրենց անպատիժ գործունեությունը Հայաստանի տարածքով մեկ, շարունակելու են ծեծել ու ահաբեկել դուրը չեկածներին, շարունակելու են կրակել, սպանել՝ հարկ եղած դեպքում, շարունակելու են խլել այլոց բիզնեսները կամ գոնե դրանց կեսը, շարունակելու են մտմտալ քաղաքացիներից գումարներ կորզելու նոր ձևերի մասին:
Վերջիվերջո՝ հենց այդ իրավունքի համար է, որ նրանց, այսպես ասած, հովանավոր հայրերը, եղբայրները կամ հորեղբայրները, կամ հենց իրենք նստում ու լսում են Սերժ Սարգսյանի առաջադիմական ելույթները, ծանրաբեռնում իրենց ուղեղն ու կորցնում իրենց ժամանակը: Որովհետև եթե այդ իրավունքը չլիներ, Սերժ Սարգսյանին լսելու էին, որ ինչ անեին: Կբերեին ու կլսեին նրան, ով կապահովեր նրանց անպատժելիության իրավունքը, ինչպես որ ապահովվել է Հայաստանի անկախությունից մինչև այսօր: Վերջիվերջո՝ հենց դրա համար է նաև, որ նրանք ճանաչում են իրենցից մեկը լինելու Սերժ Սարգսյանի իրավունքը: